FAUNDING Dairekta bilong Edukesen Pasifik Ejensi o EPA, Jeffers Teargun Heptol  long Mande dispela wik i amamas long tokaut nem bilong tripela sumatin bilong PNG husat i winim2022 skolasip long so stadi long ovasis.

Tupela bilong ol dispela sumatin husat i winim skolasip bai i go stadi masta digri bilong ol long Saina na wanpela meri bai go stadi long Netherlands long Yurop. Mista Teargun i bin tokaut long nem bilong tripela PNG sumatin husat i winim skolasip taim em i givim skolasip na tok-orait pepa i go long Steven Opur husat bai i go long kantri Saina long SuzhuYunivesiti. Mista Opur i bilong Minj long Jiwaka provins na em i wok i olsem sinia envairomentalis wantaim Ramu NiCo Menesmen (MCC) Limited long Madang.  Narapela sumatin husat i winim skolasip em Emmanuel William bilong Galp provins na em tu i wok wantaim Envairomen Seksen long Ok Tedi Maining Limited long Westen provins. Steve i bin amamas long faunding dairekta bilong EPA, Mista Teargun long helpim em long redim ol pepa wok long kisim dispela skolasip. Em i tok EPA em wanpela nesenel edukesen platform long helpim ol sumatin bilong PNG long go stadi ovasis na bringim bek gutpela ekspiriens na save i kam long kantri long helpim long divelopmen. “Mi amamas tru long MistaTeargun long gutpela sapot em i givim long promotim PNG lain long go stadi long Saina na ol arapela ovasis kantri,” Steve i tok. MistaTeargun i tokaut klia olsem Steven wantaim Emmanuel bihain tasol long ol i kisim skolasip bilong ol bai i stadi onlain pastaim long Suzju Yunivesiti taim ol i stap wok yet long kampani bilong ol long PNG. Em i tokaut tu long nem bilong namba tri sumatin em wanpela meri husat em hap Sauten Hailans na Enga. Nem bilong dispela meri sumatin em Christa Sap. Mista Teargun i tok Christa i bin aplai long EPA skolasip long go stadi long yia 2020 tasol bikos long hevi bilong COVID-19 em i no bin go bikos ol i saspendim skolasip bilong em. Tasol long dispela yia em i aplai gen na i winim bek skolasip na em i kisim gen long go stadi long kantri Netherlands long Yurop. Em i tok klia olsem olgeta rot long redim ol tripela sumatin long go  stadi ovasis em EPA yet i redim long ol i mas go skul na kisim masta na dokta digri bilong ol pastaim long ol i winim 45 krismas. Teargun i tok  dispela tripela sumatin nau i bringim namba i go 21 post-greduet sumatin aninit long EPA skolasip we i lukim foapela em ol PhD o dokta digri kendidet. Dispela em histori stret. Em i tok samting olsem 200 sumatin i stadi long digri program bilong EPA nau long ol ovasis yunivesiti. Mista Teargun  i salensim ol ogenaisesen long PNG husat i save kamapim bikpela prodaksen long luksave long wok ol wokmanmeri i mekim na salim ol i go long bikpela skul na kisim moa save na digri. “Mipela long EPA i helpim planti sumatin long kisim kwalifikesen na redim ol tu long go bek long stadi moa na tu mipela i save painim wok bilong ol bihain long ovasis stadi. “Mipela no laik ol stop tasol long digri program. Mipela laik ol sumatin i skul i go moa long masta na doktret digri program,” MistaTeargun i tok. Em i tok dispela kain sans em planti sumatin long wol i save laikim. Olsem na ol PNG sumatin husat i winim kain EPA skolasip olsem i mas yusim gut dispela taim na wokim gut skul na stadi na bringim gutpela save i kam bek long PNG long helpim divelopmen bilong yumi.

James G. Kila i raitim