ENGA Provinsal Gavman i givim wanpela proposal o plen pinis i go long Dipatmen bilong Haia Edukesen, Risets, Saiens na Teknoloji (DHERST) long kamapim wanpela nupela pablik yunivesiti em ol i laik kolim Innovative Yunivesiti bilong Enga.

Minista bilong Haia Edukesen, Risets, Saiens na Teknoloji, Wesley Raminai i tokaut long dispela taim em i toktok Wantok Niuspepa long las wiken long Madang. Dispela plen o proposal we Enga provinsal gavman i givim i bihainim lo aninit long Haia Edukesen (Jeneral Provisens) Ekt 2014. Enga Provinsal Gavman i bin plen long bungim tupela stet institusen long provins em long Enga Tisa Koles wantaim Enga Skul bilong Nesing long kamapim olsem wanpela yunivesiti. Minista Raminai i tok plen bilong Enga provinsal gavman we ol i givim i go long DHERST em ol i laikim olsem tupela institusen bai i kamap olsem fekulti em edukesen na skul bilong nesing. Ol arapela

institusen bai i go insait long ol yunivesiti kos biihain long kamap bilong Enga Inovetiv Yunivesiti. Em i tokaut klia olsem aninit long Seksen 105 bilong HEGPA na DHERST ol i bin invaitim pinis husat lain i no laik long dispela yunivesiti i ken raitim ol pas egensim dispela plen na salim i go long DHERST. Mista Raminai i tok wanpela notis pepa i bin go aut pins long Fraide, Oktoba 15 na deit notis bilong egensim dispela plen bai pas em tumora Fraide, Oktoba 29. Dispela notis we DHERST i bin putim aut i givim tupela wik bilong lain i raitim pas egensim plen bilong Enga provinsal gavman. Em i tok dispela rot bilong egensim plen i stap aninit long Seksen 106b bilong HEGPA na ol lain husat i raitim pas i mas givim nem na adres bilong ol na ol i mas sainim gut na tu givim risen o astingting bilong ol long egensim dispela plen. Ol pas bilong egensim plen bilong nupela Enga Inovetiv Yunivesiti i ken go long Ekting Seketeri bilong DHERST, Dokta Francis Hualupmomi Phd.

James G. Kila i raitim