OL namba 53 Gret 8 sumatin bilong Dirima Praimeri Skul long Gumine distrik, Simbu provins i stat sindaun long nesenel eksem bilong ol dispela wik.

Dispela gret 8 nesenel eksem i kamap long olgeta hap bilong kantri wantaim ol gret 8 sumatin statim wantaim Written Expression pepa na bai pinis long Fonde wantaim Inglis pepa namba tu. Het tisa bilong Dirima Praimeri Skul Mista Jack Gena i bin welkamim ol invijileta Mis Pauline Ninkama na Mista Elias Ule husat tupela i bin kamap long lukautim ol sumatin sindaun long eksem. Mista Gena i tok ol Dirima gret 8 sindaun long eksem sumatin i bin bungim planti hevi bilong COVID-19 pandemik tasol dispela i no stopim ol long sindaun long eksem bilong ol. Em i tok dispela corona virus em kam long stap na bihain long ekseminesen bilong ol ol sumatin i mas seif na lukautim ol long COVID-19. Pater Peter Kim bilong Dirima Katolik paris i bin givim pes mask long ol sumatin bai werim long taim bilong sindaun long nesenel eksem bihain long em i blesim ol ekseminesen pepa long las wik Sande. Inspekta bilong skul Michael Sipa tu i bin go raun lukim skul na tokim ol sumatin na tisa long stap seif long COVID-19 long dispela wik bilong eksem. Mista Sipa husat i ran long moto baik bilong em go lukim olgeta 24 praimeri skul insait long distrik i sindaun long nesenel eksem dispela wik. Em i tok olgeta skul long distrik i sindaun long eksem tasol Omkolai praimeri skul i gat wanpela sik sumatin husat bai no inap sindaun long ekseminesen dispela wik.

Ennio Kuble i raitim