HENGANOFI i namba wan rural distrik long Isten Hailans long kisim ol COVID-19 veksin o marasin i go na lonsim long Henganofi gavman stesin long tupela wik i go pinis.

Tasol em i no isi long kamapim edvokesi (advocacy) na wokim pe bipo long ol lokol man na meri i bin kisim bel isi na sampela gutpela tingting na ol i go sanap long lain long kisim marasin bilong COVID-19. Sif  Eksekutiv Opisa (CEO) bilong EHPHA Dokta Joseph Apa husat i bin i go wantaim ol senia opisa bilong em long Henganofi na launsim dispela veksinesen program i tok, planti man na meri i wok long lusim laip bilong ol long provins, long wanem, ol i no kisim dispela veksin long banisim ol yet. “Mipela i no inap subim yu long kisim COVID-19 banis sut,” Dokta Apa i tok. “Em i laik bilong yupela wan wan. Yu ken kisim veksin, na sapos yu no laik, em laik bilong yu. “Tingim, COVID-19 em i kam na i stap pinis long Isten Hailans. “Olsem na em i gutpela moa long kisim marasin na banisim yumi yet. Na sapos yu no laik kisim marasin, em yu yet nau.” Em i surukim tok i go moa na tok, long mun Septemba i kam antap long namel bilong dispela mun Oktoba, bikpela Goroka Provinsal Haus sik i mekim ripot olsem 125 manmeri i bin lusim laip bilong ol long dispela sik. Dai bilong dispela sik em i no stop. Olgeta de, foa o 5-pela manmeri i wok long kam insait long bikpela Goroka haus sik. Long wan kain taim, ol helt woka i kisim tes long ol, em ol i positiv COVID-19 sik lain. Planti long dispela ol lain em ol i kam long ol hauslain na viles long 8-pela distrik long provins em Kainantu, Henganofi, Okapa, Obura/Wonenara, Lufa, Unggai/Bena, Daulo na Goroka distrik yet. Memba bilong Henganofi, Robert Atiyafa i bin go long launs dispela program. Dokta Apa i amamas tu long lokol MP Robert Atiyafa husat i bin kamap wantaim K1 milien we em i givim i go long Kainantu Helt Senta long karimaut COVID-19 wok na tu ol arapela wok bilong helt long distrik bilong em. Dokta Apa i tok em i gutpela long lukim ol lokol Memba bilong Palamen, moa long Henganofi Memba i kamap na patna wantaim EHPHA we wok bung na lukim wok i go het strong long distrik na provins. Em i amamas tu olsem planti ol lokol manmeri i bin kamap na pulim lain long kisim veksin long taim bilong lonsing. Dokta Apa i tok, ol helt woka long Henganofi bai i go het yet long givim COVID-19 veksin bihain long dispela opisal lonsing. Em i tok ol arapela 7-pela distrik bai bihainim Henganofi long ol wik i kam.

Sape Metta i raitim