PRESIDEN bilong Usino lokal level gavman (LLG) long Usino-Bundi distrik long Madang provins, Peiwa Aimai i askim olgeta wod kaunsil na ol LLG presiden long Madang provins long go kisim coronavirus (COVID-19) banis sut.

Em i tok dispela long banisim ol yet na famili bilong ol. Em i mekim dispela tok long las wik bihain long em i kisim COVID-19 banis sut long Madang. Em i tok bikos ol wot kaunsil na ol LLG presiden i stap klostu long ol pipel, ol i mas go pas long soim pasin long kisim banis sut olsem ol arapela memba bilong komyuniti bai bihainim ol na kisim banis sut. Em i tok COVID-19 em i tru na i wok long bagarapim planti samting olsem helt, ikonomi na sosel laip. “Coronavirust i no kaunim man o meri, sapos yu lida o nogat, yangpela o lapun, gat save o nogat, em i kisim olgeta manmeri,” Aimai i tok. Em i tokim Wantok Niuspepa olsem em i bin draiv long ples bilong em long Ono na i go olgeta long Madang Jeneral Haus sik na kisim banis sut bikos olsem lida em i laik soim ol pipel bilong em olsem ol tu i mas kisim dispela banis sut o veksinesen long banisim ol yet egensim COVID-19. Em i tok gavman i tokaut olsem veksinesen em voluntari o laik bilong wan wan manmeri long kisim, tasol em i askim ol olsem gutpela ol i kisim long banisim ol. Em i tok sapos ol i no kisim dispela sut, ol inap isi long kisim COVID-19 na i ken kisim bagarap. Em i tok tu olsem kisim dispela banis sut bai gutpela long ol yet na ol famili bilong ol. Em i tok tenkyu long gutpela wok ol franlain manmeri olsem ol nes na dokta i mekim long sevim laip bilong ol manmeri. Em i tok sapos ol franlain opisa i no stap, planti manmeri inap kisim bagarap.

James G. Kila i raitim