GAVANA bilong Nesenel Kapital Distrik, Powes Parkop i tokaut olsem bai i nogat lokdaun long Pot Mosbi.

Tasol em i toktok strong long ol pipel i mas wok hat long daunim dispela sik nogut long kalap kalap na tu em i askim ol pipel long kisim veksin. Long dispela taim tu, ol bisnis long kantri i wok long bungim planti salens bikos long dispela hevi. Ol bisnis nau i wok long bihainim nupela pasin long menesim COVID-19 na Delta Varient. Dispela disisen bilong nogat lokdaun i kamap bihain long sampela konsaltesin wantaim ol stekholda, ol bisnis komyuniti na Nesenel Pandemik Rispons Kontrola, Dokta Daoni Esorom. Ol i tok long dispela taim em i hat tru long putim lokdaun bikos ikonomik status nau i stap long taim nogut. Ikonomi i pundaun, planti manmeri i no gat wok  na ol bisnis i wok long bagarap.

Long mentenim dispela,  olgeta pipel i mas bihainim nupela pasin bilong lukautim ol yet. Kantri na Gavman i nidim ol bisnis long stap strong. Na ol sitisen tu mas mekim hap bilong ol long sapotim ol bisnis long go hetim wok bilong ol. Nesenel Pandemik Kontrola David Manning tasol i gat pawa bilong putim lokdaun sapos namba bilong ol keis i go antap moa yet. Long dispela taim, Lae i kamap hotspot eria na ol bisnis haus i wok long kisim taim. John Byrne, Presiden bilong Lae Semba bilong Komes i tok PNG i hat tru long go long lokdaun bikos ol bisnis i mas go het bilong holim ikonomi bilong kantri. Ol kampani i wok long traim kain kain rot long kisim ol wok manmeri bilong ol long kisim veksin tasol long mekim veksin i kamap mendetri em i hat.