Samantha Solomon i raitim NESENAL Pandemik Kontrola na Polis Komisina David Manning i tok welkam long ol Imejensi Medikol tim long United Kingdom (UK) long Tunde dispela wik long Pot Mosbi.

Ol dispela tim i kam long helpim  Papua Niugini long stopim COVID-19 long go bikpela insait long kantri. Ol bai wok insait long kantri long 6-pela wik. Kontrola Manning i tok, makim maus bilong gavman bilong Papua Niugini mi laik tok welkam na amamas long kam bilong yupela. Dispela medikol tim bai go long Maunt Hagen Westen Hailans Provins long helpim ol COVID-19 tim long mekim wok bilong stopim COVID-19 insait long provins . Ol bai go long Maunt Hagen long Trinde 27 Oktoba. Miplea i amamas long British Gavman long dispela frensip mipela i gat long helpim wanpela na narapela. Bikpela komyuniti trensmisen i bin kamap long tupela mun i go pinis. Planti manmeri i dai na mipela i nidim tru dispela helpim. Hai Komisina bilong UK long Papua Niugini Keith Scott i tok amamas long gutpela toktok Kontrola i mekim. “Taim dispela pandemik i bin kamap long tupela yia i go pinis mipela i bin traim long helpim gavman bilong Papua Niugini,” Mista Scott i tok. Mipela i bin givim ol medikol ikwipmen long mani mak olsem 500 milien US dola. Nau mi amamas long mipela i givim narapela bikpela helpim wantaim ol medikol tim.

Dispela ol tim i kam bihain long gavman na ol nesenal kontrol tim i askim UK gavman long helpim Papua Niugini long stopim COVID-19. Tim lida bilong UK Imejensi tim Peter Sykes i tok sori bilong em i go long ol pipel bilong Papua Niugini husat i lusim wanpela famili memba long sik COVID-19 o husat i painim hevi taim dispela sik i bin kamap. Mista Sykes i tok, “Dispela sik em i kamap long olgeta hap long wol na em i nidim sapot bilong wanpela na narapela long stopim sik long go bikpela.” “Mipela bai wok long mak olsem 6-pela wiks na bai pinis,” em i tok. Mak olsem 10 helt wokmanmeri i mekim dispela tim na i kam. Sampela bilong ol em ol dokta na sampela ol nes na speselis.