BIHAINIM singaut bilong em long ol pablik sevan i mas kisim veksin Sif Seketeri Ivan Pomaleu i singaut tu long ol het bilong gavman ejensi na ol provins long mekim ol arensmen long mekim isi long ol pablik sevan i ken kisim veksin.

Mista Pomaleu i tok opis bilong em bai i wok long putim ol veksin ples we bai i isi long ol pablik sevan long Pot Mosbi long go kisim sut. Em i singaut tu long ol het bilong ol gavman ejensi long ol provins long mekim wankain. Em i tok ol i mas mekim ol arensmen long bringim ol veksin tim i go long ol opis bilong ol na mekim isi long ol wok manmeri long opis bilong ol long kisim sut. Long Pot Mosbi ol ples bilong kisim sut em long Rita Flynn Courts, Vision City na Pot Mosbi Jeneral Haus Sik Ka Pak. Ol pipel yet i ken mekim disisen wanem kain veksin ol i laik kisim. Long Rita Flynn Courts ol i givim Astra Zenecca na long Vision City ol i givim Johnson and Johnson veksin. Ol lain i laik kisim Sinopharm veksin i ken go long Pot Mosbi Jeneral Haus Sik. Ol gavman wok manmeri tu i mas go kisim ol infomesen bilong ol veksin long ol helt fesiliti sapos ol i no klia gut “Ol veksin i fri na i stap redi long ol pipel i kisim. Long kisim veksin em i laik bilong wan wan man na meri. Tasol, long lukim ol impoten gavman sevis na ikonomi i ken ran yet ol pablik sevan i nid long kisim veksin.