OIL Search i komitet tru long lukautim ol wokmanmeri bilong em na ol pipel long PNG long COVID-19. Bihain long kampani i sainim Memorandum ov Understanding (MoU) wantaim PNG Nesenel Kontrol Senta, olgeta wok manmeri bilong Oil Search na ol komyuniti i wok long kisim veksin nau.

“Mipela amamas olsem mipela i ken mekim pat bilong mipela long wok wantaim Nesenel Gavman na Nesenel Kontrol Senta long menesim risk bilong COVID-19 wantaim veksin.” Ekseketiv  Vais Presiden bilong na Het bilong Kampani, Leon Busken i tok. Em i tok Oil Search i stap oltaim long helpim na sapotim ol lida na ol komyuniti long taim kantri i bungim hevi. Long dispela taim, olgeta operesen senta bilong Oil Search i no kisim hevi bilong COVID-19 yet. Dispela em bikos long ol strongpela lo wantaim kwarentin na test long olgeta tupela wik. Kampani i mekim moa long 54, 000 COVID-19 test long ol medikal klinik na kwarentin fasiliti bilong en na tu i distributim 450, 000 PPE i go long ol helt woka na givim moa long 1300 dos bilong AstraZeneca na J&J veksin. Moa long 1150 wok manmeri bilong Oil Search na ol kontrakta long PNG i kisim COVID-19 veksin pinis. Api Kassman, het bilong COVID-19 Veksinesin Ministerial Taskfos i tok Gavman nau i wok klostu wantaim ol kampani  we i gat ol rejista medikal wok lain long givim veksin. Em i askim ol bisnis long kantri long rejista na kisim veksin long Nesenel Call Senta. Namba long ringim em 1-800-200.