MOA long 800,000 pikinini i bin kisim dispela malaria veksin long taim ol i wok long testim dispela marasin stat long 2019.

WOL Helt Ogenaisesen (WHO) i givim tok orait nau long ol kantri long Afrika i ken yusim malaria veksin long banisim ol pikinini egensim dispela sik. Dispela em i namba wan veksin bilong banisim ol pikinini long sik malaria.  Ol saintis i wok long testim dispela veksin long ol pikinini long tripela kantri Afrika long 2019 i kam inap nau na WHO i givim tok orait olsem em i seif long yusim. • WHO i tok em i orait long givim dispela veksin i go long ol pikinini long Afrika. • Long 2019, malaria i bin kilim 274,000 pikinini  krismas bilong ol i aninit long 5-pela yia long Afrika. • Ol saintis i bin wok long kamapim dispela veksin inap long 30 yia na nau ol i tok em i orait long yusim. Olgeta yia, sik malaria i save kilim hap milien pipel long wol na i save birua tru long ol pikinini krismas bilong ol i aninit long faivpela yia. Yunaitet Nesens (UN) i givim tok orait long RTS,S — o Mosquirix — veksin em wanpela bikpela marasin kampani ol i kolim GlaxoSmithKline i bin wokim long 1987. WHO i tok ol i wokim disisen bilong tok orait long dispela marasin bihain long ol i kisim gutpela risal long ol risets ol i bin wokim long tripela kantri long Afrika. Dispela risets i bin glasim moa long 800,000 pikinini long Ghana, Kenya na Malawi husat i bin kisim dispela veksin long 2019 i kam inap nau. Dairekta Jeneral bilong WHO, Tedros Adhanom Ghebreyesus i tok dispela i wanpela bikpela samting tru long histori. “Ol saintis bilong Afrika yet i bin kamapim dispela veksin long Afrika na mipela i amamas tru long dispela wok,” em i tok. “Dispela veksin wantaim ol arapela bai inap long stopim malaria na sevim laip bilong planti tausen pikinini long wan wan yia.” Moa long 90 pesen keis bilong sik malaria i save kamap long Afrika we i gat moa long 1.3 bilien pipel. WHO i tok long 2019, dispela sik i bin kilim 386,000 ol pipel long Afrika we 274,000 em ol pikinini krismas bilong ol i aninit long faivpela yia. Ol natnat i save karim dispela sik na givim i go long ol manmaeri long taim natnat i kaikaim ol. Skin hat, het pen, traut na bodi no gat strong, em sampela sain bilong dispela sik.