NU AILAN Provinsal Gavman i opim K18 milien rurel haus sik autpesen long Matalai LLG long Namatanai distrik long las wik.

Bai gat selebresen opim i kamap long 29 Oktoba. Gavana Sir Julius Chan i go pas long opim dispela haus sik. Em i tok Matalai LLG i gat bikpela namba bilong ol manmeri long Namatani distrik we i gat olsem 40,000 manmeri. Arere long Namatanai distrik haus, Matalai haus sik inap long givim sevis long ol arapela LLG olsem Tanir, Konoagil na tu Namatanai LLG yet. Foapela dokta inap wok long dispela haus sik wantaim 40 wok manmeri. I gat tupela nes apatmen o bikpela haus ol nes inap long stap long en. Sir Julius i givim nem bilong mama bilong em, Tinkoris, long haus sik. Provinsal Edministreta Lamillar Pawut, ol Memba bilong Provinsal Ekseketiv Kaunsil, Dairekta bilong Kuretiv Helt Kea em Dokta Charles Peni na ol wok manmeri bilong Kavieng Provinsal Helt Atoriti i bin stap long lukim Sir Julius i opim dispela haus sik. Dokta Peni i amamas na tok tenkyu long Sir Julius long kamapim kain haus sik olsem. “Mipela inap long kolim dispela haus sik olsem rurel haus sik bikos em inap long givim sevis long 40,000 i go long 50,000 manmeri long tripela lokal level gavman,” em i tok. “Mipela i mas amamas olsem mipela i gat wanpela lida husat i gat tingting long kamapim kain sevis long ol pipel. “Dispela haus sik i givim sevis long ol manmeri na ol lain i kam bihain.