WAN WAN Memba bilong Palamen i mas save long ol hap na rot ol Provinsal Helt Atoriti (PHA) bilong ol i yusim K4 milien mani gavman i makim bilong pait egensim coronavirus (COVID-19), Minsta bilong Helt na HIV/AIDS, Jelta Wong i tok. Em i tok ol i no ken paul na kamapim ol paul toktok long palamen.

Em i mekim dispela tok long bekim Poin ov Oda askim Memba bilong Vanimo-Green na Oposisen lida, Belden Namah i mekim long palamen kibung long Tunde. Namah i askim Wong long tokaut long mani gavman i bin makim long insait long 2020 K5.7 bilien 2020 Stimulus Pekes. Insait long dispela mani, gavman i bin makim K501 milien long pait egensim COVID-19 na ol arapela wok i pas long em. Long dispela gavman i givim wan wan ol PHA K4 milien long yusim long ol wok i pas tru long COVID-19. Taim Namah i wok long toktok Is Sepik Gavana Allan Bird i mekim Poin ov Oda na i askim Namah long em i mas harim gut ol ripot bilong ol wok ol Minista na Palamenteri Stiering Komiti i save mekim na i no paul na kamap wantaim ol toktok i no tru. Em i tok taim ol Memba i no mekim ol tok i nostret, ol pipel bai i tingting ol Memba i lain bilong giaman. Wong i bin wok long bekim ol askim bilong Gavana bilong Isten Hailans Peter Numu long save sapos gavman i gat plen long helpim provins bilong em long taim Namah i mekim Poin ov Oda. Numu long askim bilong em i laik save sapos gavman i gat plen long helpim provins bilong em long stretim ol hevi bilong COVID-19, moa long kamap bilong Delta Variant.

Em i tok hevi bilong helt long provins bilong em i bikpela tru long dispela taim we planti manmeri i kisim COVID-19, mak bilong namba ol manmeri i sik long COVID-19 i go antap na planti manmeri i dai tu na ol haus sik i pulap long ol sik manmeri na i no gat spes moa long putim ol dai bodi. Pastaim long dispela Memba bilong Pomio, Elias Kapavore i bin mekim wankain ol askim we Wong i tok em bai bekim gut ol askim long wanpela pepa long wanpela sindaun bilong ol palamen kibung long dispela taim i go. “Wok bilong husat em long givim oda long abrusim sik coronavirus (COVID-19),” Numu i askim. “Wok bilong husat long lukim olsem ol manmeri i bihainim dispela ol oda. “Mi no lukim wanpela opisa i stap na tokim ol manmeri long rot bilong stap long provins. “Yu gat mani long rolimaut veksinesen. Husat i mas go pas long karimaut dispela rolaut? “Gavman bilong mi i givim K1.4 milien long rolimaut COVID-19 program long provins tasol dispela i no inap. “Yu gat plen long helpim provins bilong mi?” Long dispela Wong i tok em i bung pinis wantaim Treseri Dipatmen na Dipatmen bai givim mani long liklik taim long helpim ol provins na distrik we i gat imejensi keis. Em i tok moa olsem i no gat narapela rot bilong daunim kamap bilong sik na olsem bikpela samting em, ol manmeri i mas kisim COVID-19 veksinesen, no ken raun go kam nating na i no ken kamapim ol bung.

Paul Zuvani i raitim