WANPELA voluntia tisa long Sentral Provins i givim taim bilong em long skulim gut ol mangi long Kokoda Trek, maski long ol salens bilong coronavirus (COVID-19).

Dispela tisa em 40yia meri Noelyn Wati. Bihain long man bilong Wati i dai long 2015, em i voluntia long kisim trening na kamap tisa na sapotim famili bilong em. Em i kisim ol sotpela skul long Seven De Edventis komyuniti bes program na long 2018 em i stat tis long Bisiatabu Praimeri Skul long Sogeri long Sentral Provins yet. “Mi tokim namba wan pikinini man bilong mi olsem papa bilong em i dai pinis na olsem em i mas skul hat na bihain sapotim em yet,” Wati i tok. “Tasol mi pilim olsem mi tu i mas mekim sampela samting olsem mi tu i mas sapotim famili. Mi no laik long stap nating long haus. “Mi pilim amamas taim mi kisim trening long kamap tisa na mi amamas long lukim ol sumatin i save long samting mi tis long em.” Long 2019 Wati i kisim skolasip na i wok long kisim ol skul bilong Gret 10 i go long Gret 12 long Flexible Open Distance Education (FODE) long Pot Mosbi wantaim helpim bilong Kokoda Initiative aninit long Kokoda Track Foundation na Australia Hai Komisin (AHC). Wati i namel long 40 arapela manmeri em Kokoda Initiative na AHC i trenim long kamap ol tisa na helt woka long ol ples we Kokoda Trek i stap long em insait long Noten na Sentral Provins. AHC i bilip olsem Wati bai namel long 17 ol arapela FODE sumatin husat bai greduet na kisim Gret 12 setifiket long 2021 na bihain tren gut long kamap ol tisa, helt woka na ol viles helt voluntia. “Mi gat bilip long mekim gut long dispela Gret 12 eksaminesen,” Wati i tok.