INAP long 242,000 sumatin long Gret 8, 10 na 12 bai sindaun long fainel eksaminesen bilong ol stat long neks wik i go.

Olsem 74,000 ol Gret 10 sumatin bai sindaun long eksam bilong ol long Mande 11 Oktoba i go pinis long Fraide 15 Oktoba. Bihain long dispela olsem 30,000 Apa Sekenderi Skul Setifiket Eksaminesen (Gret 12) sumatin bai sindaun long eksaminesen bilong ol stat long Mande 18 Oktoba na pinis long Trinde 20 Oktoba.

Bihain long dispela inap long 138,000 sumatin bai sindaun long fainel eksaminesen bilong ol stat long Mande 25 Oktoba na pinis long Fonde 28 Oktoba. Edukesen Seketeri Dokta Uke Kombra i tok dispela ol eksam i bikpela samting long wanem ol inapim ol mak ol i gat long bihainim ol intenel eksam ol i mekim long yia. Em i tok maski i gat hevi bilong coronavirus (COVID-19), dispela yia i bin gutpela liklik we ol sumatin i bin inap long go gut long skul. Em i askim ol papamama, ol gadien na ol tisa long givim gutpela sapot long ol sumatin long taim ol i sindaun long eksaminesen. Em i askim ol sumatin long no ken yusim hait ansa na bekim ol askim. Em i tok ol inap long kisim bikpela mekimsave sapos dipatmen i painimaut. Em i askim ol tisa tu long no ken sapotim ol sumatin long mekim olsem. “Yu i no inap long kisim setifiket bilong yu sapos dipatmen i painimaut olsem yu hait na kisim ol ansa na bekim ol askim,” Dokta Kombra i tok. “Mi askim ol tisa na ol arapela edukesen opisa long ripot taim ol i save i gat kain pasin i wok long kamap.” Em i askim olgeta lain i pas long givim eksaminesen long givim sans long ol sumatin long mekim gut long eksaminesen bilong ol. Em i wisim ol sumatin long mekim gut long eksam bilong ol.