SEKETERI bilong Edukesen, Dokta Uke Kombra i askim ol gavman opis na bisnis haus long askim Mesamen Sevis Divisen (MSD) bilong Edukesen Dipatmen long sekim ol Gret 10 na 12 skul setifiket bipo long ol i kisim ol manmeri long wok.

Dokta Kombra i mekim dispela askim bihain long Dipatmen i rausim planti ol sumatin long ol tisa koles long kantri long dispela yia na ol arapela yia i go pinis. Em i mekim dispela singaut tu bihain long ripot bilong PNG Difens Fos we ol i painim olsem planti ol rikrut i kisim kopi bilong setifiket bilong ol arapela lain na yusim long aplai na go insait. “Mipela i laikim edukesen sistem we em i fea, i gat hatwok, komitmen na save wanpela i gat taim mama karim em,” Dokta Kombra i tok. “Dispela em ol bikpela tingting em gavman i promotim. “Mipela i bihainim ol gutpela na stretpela rot long mekim wok.” Dokta Kombra i tok Dipatmen i wok hat long daunim korapsen pasin we i wok long kamap long ol arapela ogenaisesen. Em i tok planti ol ogenaisesen i no bihainim ol gutpela rot na sekim ol man na meri bipo long ol i kisim ol long wok. Em i tok setifiket Dipatmen i givim long 2018 na i kam antap i gat ol strongpela sekyuriti mak we yu no inap long rausim ol mak o putim narapela mak antap. “Dipatmen i givim fri sevis long ol opis husat i gat hevi long ol sefifiket bilong ol apliken long taim bilong rikrut,” Dokta Kombra i tok. “Wanem opis i gat hevi wantaim setifiket i mas ringim ol olsem Dipatmen i ken helpim na sekim ol setifiket. Em i tok ol i ken ringim MSD long dispela namba em 328 8876 long sekim ol Gret 10 na 12 setifiket na tu salim email long dispela ol opisa em  Kuagai_Dua@ education.gov.pg; or Packiam_Arulappan@ education.gov.pg