OL haus sik long kantri i wok long bungim hevi nau long givim besik helt sevis long ol pipel bikos long ol disisen nesenel gavman i bin mekim long taim bilong COVID-19 pandemik.

Dokta David Mills, Dairekta bilong Rural Helt na Trening long Enga Baptist Helt Sevis i tok long taim COVID-19 pandemik i bin stat, ol sios i bin tokaut olsem bai i gat bikpela hevi i kamap long helt sevis. Na nau ol i wok long pilim dispela hevi. Em i tok, PNG i lukim planti ol liklik haus sik i pas pinis na bikpela tu olsem long Mt Hagen Hospital i tok bai ol i pasim sapos gavman i no givim mani ol i nidim hariap. Dr Mills i tok nesenel gavman i save helpim ol sios helt sevis long baim ol wokman na givim sevis, tasol nau gavman bilong Australia i givim mani long baim ol woka, na mani bilong operesen sevis ol i katim pinis go daun long 10 pesen tasol. Em i tok Kompiam Rural Hospital i wok yet long givim sevis long wanem em i save kisim sampela sapot mani i kam long Australia na ol narapela kantri we i luksave long bikpela nid long larim haus sik i op i stap.