OL pipel long ol ples long Kokoda trek bai kisim veksin. Kokoda em i wanpela hap we nogat gutpela rot na gavman sevis i save go.

Ol pipel save wokabaut o go long balus tasol. COVID-19 em i no kauntim wanem kain man na meri. ol helt wokmanmeri bai go long dispela ol ples na givim veksin long ol pipel. Planti infommesen we em i no tru i wok long go aut long kantri na mekim ol pipel i tingting planti long dispela veksin. Nesenal Dipatmen bilong helt i wok bung wantaim Sentral na Oro Provinsal Helt Atoriti, Seven De Edventis Helt Sevis, UNICEF na wantaim sapot bilong Australia Gavman long givim veksin long ol pipel long Kokoda trek. Na tu ol i bai givim ol tru infomesen long wok bilong dispela veksin. Dispela wok bilong givim veksin em i wanepla bilong ol wok PNG na Australia i save patna na wokim long en long helpim Kokoda komyuniti. Namba wan bung i kamap namel long komyuniti lida na ol tisa wantaim ol helt wokmanmeri long stretim ol tok giaman i wok long kamap. Ol dispela lida i kisim ol piks na vedio long soim dispela ol 63 Kokoda komyuniti long wok bilong veksin. Dispela wok i kamap pinis na moa long 700 manmeri i kisim veksin long Sogeri, Efogi, na Kokoda eria. Wanpela tisa long Efogi William Iga i bin les long kisim veksin pastaim tasol nau em i kisim. “Olsem wanpela tisa mi save toktok na stap wantaim ol sumatin husat i save kam long ol narapela hap, mi pret long givim sik long ol dispela sumatin na mi kisim veksin,” Mista Iga i tok. Wod Kaunsila bilong Depo, Billy Iwai i tok, “Olsem wanpela lida mi mas kisim veksin pastaim na mi bai tokim ol pipel long kam na kisim.” Kokoda Trening Atoriti Sif Ekseketiv Opisa Julius Wargirai wantaim ol 20 wokmanmeri husat i go long givim veksin long pipel tu i  kisim veksin. Mista Wargira i tok, “Mi laik soim ol wokmanmeri, ol lain long ples na ol arapela olsem veksin em i seif na ol pipel husat i save stap long Kokoda i mas kisim veksin.”