ISTEN Hailans Provis i putim kefiu nau bilong helpim long daunim COVID-19 long provins. Provinsal Helt Atoriti i kamapim dispela kefiu long las wik Fonde.

Dispela kefiu i stat  long 1 Oktoba na bai pinis long 16 Oktoba. Ol pipel i mas stop long muv raun stat long 5 klok long apinun inap long 6 klok moning. Dispela kefiu bai stap tupela wik stat long. Dispela long daunim kamap bilong COVID-19 long provins na moa yet long kamap bilong nupela COVID-19 em Delta Verient. Dispela oda i kamap bihain long taim provins i bungim bikpela hevi we planti manmeri i wok long dai. Goroka, Benabena, Henganofi na Kainantu em ol distrik we i gat bikpela namba bilong COVID-19 keis. Provinsal kodineta bilong COVID-19, John Gimisive i tok provins i gat bikpela namba bilong COVID-19 keis long dispela taim. “Provins nau i go insait long bikpela hevi long dispela sik na dispela komiti i pasim tok long kamapim ol ristriksen long provins,” Gimisive i tok. “Mipela i gat bikpela wari nau olsem COVID-19 em i kam strong tru na i wok long daunim ol pipel.” Em i tok komiti bilong em i givim tok orait long kamap wantaim dispela oda long go kam bilong ol manmeri. Kefiu i wanpela long ol rot komiti i kamap wantaim long daunim kamap bilong COVID-19. Komiti i kisim tok orait long pasim bikpela Goroka maket na ol arapela maket olsem Kakaruk na Suave. Kefiu em i stat long Fraide Oktoba 01, 2021 na bai ron inap tupela wik we em bai stop long Sarere Oktoba 16, 2021. “Sapos i no gat ol strongim i kamap insait long dispela tupela wik, em nau komiti bai lukluk long lokdaun bihain long dispela kefiu”, Gimisive i tok. Em i go moa na askim ol pipel bilong Isten Hailans long putim pes mask olgeta taim, wasim han klostu, klostu, kamapim sosel distensing na tu i go long ol veksinesen senta na kisim sut long banisim dispela sik, na i no givim sik long ol manmeri. Nau yet Sif Eksekutiv Opisa bilong Isten Hailans Provinsal Helt Atoriti Dokta Joseph Apa husat em deputi kontrola bilong Provinsal COVID-19 komiti i tok bikpela samting long pait egensim dispela sik em long yu no ken wokabaut nating i go kam o  i go bung wantaim planti manmeri. “Yumi mas bihainim nupela pasin (Niu Nomol) na lukautim yumi yet gut long yum ii no ken kism dispela binatang bilong coronavirus,” Dokta Apa i tok. “Long pait egensim COVID-19 em yumi yet i mas lukautim yumi yet gut. “Em i gutpela long kamap long veksinesen senta na kisim marasin o sut bilong banisim yumi yet long dispela sik,” Dokta Apa i tok.

Sape Metta i raitim