LAS wik kensa klinik long Pot Mosbi Jeneral haus sik i bin selebretim wanpela impoten de bilong en ol i kolim “Daffodil De”. Daffoldil em wanpela naispela plawa we i gat yelo kala. Dispela plawa em  makim hop.

Na dispela selebresen i kamap long soim ol kensa sik manmeri olsem ol i gat hop yet long paitim dispela sik. Sista Hazel Agudiyosi, husat i makim kensa klinik i bin tok klia long mining bilong Daffodil de na i tok, “Planti famili i lusim ol susa, mama, anti, papa, ankol, brata na bubu long sik kensa. Em i bikpela pen na wari long lukim dispela. Olsem  na mipela ol wok manmeri bilong kensa klinik i mekim dispela awenes long strongim tingting bilong ol narapela olsem i gat hop long paitim dispela

sik.” Em i tok dispela awenes ol i mekim em bilong helpim ol pipel long ol i mas visitim haus sik na sekap kwiktaim sapos ol i pilim pen long bel o narapela hap long bodi. I gutpela long save long yu yet, olsem yu gat sik o nogat. Na sapos yu gat dispela sik, ol dokta i ken helpim yu long givim marasin kwiktaim bilong pinisim. Planti i save wet longpela taim tumas inap sik kensa i kaikai olgeta hap bilong bodi pinis olsem na ol dokta i no inap long pinisim. Na long dispela tasol, planti i wok long dai. Selebresen bilong daffodil de em i givim hop long ol lain i gat sik kensa olsem ol i ken kamap orait ken. Na long ol lain i nogat long go long haus sik na sekim ol yet long save long status bilong ol. Namba bilong kensa keis long PNG i wok long go antap olgeta yia.

Carolyne Ketsimur i raitim