“KANTRI i gat bikpela hevi bilong kensa sevis. Olgeta hap bilong kisim tritmen bilong kensa i no stap long wanpela hap.  Ol hap bilong kisim kensa sevis i stap long ol kain kain hap insait long kantri,” Dokta Paki Molumi i bin mekim dispela tok long taim kensa klinik i bin selebretim Daffodil de.

“Ol kensa sik manmeri i save muv raun long olgeta hap long kisim tritmen. Olsem na nau mipela i laik senisim dispela na putim olgeta tritmen long wanpela hap tasol,” em i tok. Gavman i helpim long sanapim bikpela kensa fasiliti. Dispela fasiliti i gat 4-pela hap bilong inapim wan yia baset bilong gavman. Namba wan hap em long mekim ol kensa banka bilong putim tupela bikpela kensa masin. Wanpela masin stap pinis na i redi long sanapim taim fasiliti i pinis. Namba tu hap em long mekim ol straksa.

PM Marape i givim K10 milien pinis bilong putim ol straksa olsem metal beam, antap flo, wol na ruf. Dispela bai inapim mani mak long K7.6 milien. Na dispela wok bai pinis long Mas 2022. Namba tri hap em enjiniaring na sevis we iletrikal, plaming na olgeta samting we i stap insait long fasiliti. Long pinisim dispela kensa projek bai inapim mani mak long K50 milien. Sabmisen bilong projek i pinis na i go pinis long nesenel plening na tresari. Bihain long dispela projek i pinis, Pot Mosbi kensa sevis bai bikpela kensa fasiliti we i gat olgeta tritmen i stap long en. “Mipela bai traim hat long putim ol marasin na ol sken masin i go insait long dispela fasiliti long 2023 i go long 2025,” em i tok. Em i tok long menesim kensa fasiliti i no isi wok. Na long helpim kensa sik manmeri i no liklik wok. Ol dokta na nes i no inap lukluk tasol long helt nid, nogat, ol bai lukluk tu long fisikal, imosinal, sosol na spiriult nid bilong ol. Kantri i no gat ol rait human risos long wok insait long dispela fasiliti. Olsem na Pot Mosbi Jeneral haus sik i wok long salim ol dokta na nes i go kisim trening na kam bek wok long kensa fasiliti. I gat tupela onkolojis (dokta bilong sik kensa) i stap pinis na redi long wok. Ol pinisim ol

stadi bilong ol wantaim Skul ov medisin long UPNG. Tupela dokta i go stadi long University ov Colombo long Sri Lanka medikol trening na 3-pela i go kisim trening bilong rediesen terapi na ol nes i wok long kisim trening yusim Zoom wantaim ol haus sik long Australia. Long 2025 kensa fasiliti i mas pinis na wankain taim i gat ol rait human risos i stap pinis long wok long en.

Carolyne Ketsimur i raitim