MOROBE Gavana Ginson Saonu i tok strong long ol kampani long Lae i mas fleksibel wantaim polisi bilong ol long COVID-19 veksinesen program bilong ol.

Em I tok i nogat lo i tok ol wok manmeri long Papua Niugini i mas kisim veksin. Gavana Saonu i konsen olsem ol ripot i kam long ol wok manmeri olsem sampela kampani i pretim ol long pinisim ol long wok sapos ol i no kisim veksin yet. Em i tok, “Ol kampani i mas bihainim ol lo bilong kantri na olsem nau yet em i no lo long ol manmeri i mas kisim veksin pastaim na go long wok. “Ol pipel i gat fridom long kisim veksin o sapos ol i no laik em i laik bilong ol tu,” Gavana Saonu i tok. “Tasol ol kampani i ken strongim ol COVID-19 protokol bihainim ol mesa we Nesenel Helt Dipatmen na World Health Organization i givim. “Na ol kampani i no ken toktok long pinisim ol wok manmeri long wok bikos ol i no kisim veksin. Long pinisim ol wok manmeri long wok bai i kamapim bikpela hevi long ol famili na tu kampani bai i sot long prodaksen bilong en. “Gavman bilong mi long Morobe bai i no wanbel wantaim ol kampani husat i mekim nogut long ol pipel husat i helpim long groim ikonomi bilong provins,” Gavana Saonu i tok. Em i tok moa olsem ol provinsal atoriti bai i putim ai long ol ripot we i toktok long pinisim ol wok manmeri long wok bikos ol i kisim veksin. Em i singaut tu long Nesenel Pandemik Kontrola David Manning long lukluk long dispela isu na stretim.