ORO Gavana Gary Juffa i tokaut olsem Oro Provins i nidim wanpela mog hariap. Em i tok em i bin toktok wantaim Provinsal Helt Atoriti (PHA) bod, Sekretari bilong Nesenel Helt Dipatmen (NDOH), na ol arapela lida bilong helt long provins pinis tasol em I no save bilong wanem na mog i no kamap yet.

Em i tok long Janueri dispela yia nesenel gavman i makim pinis K2 milien long wokim nupela mog. Wantaim dispela mani ol bai i baim ol ais bokis kontena long mak bilong K40,000 bilong helpim long sotpela taim na ol i ken go het long wokim nupela mog. Gavana Juffa i tok populesen bilong Oro i gro na liklik mog bilong ol i bagarap tru na i no inap lukautim nid bilong olgeta pipel bilong Oro provins. Kondisen bilong mog i no gutpela na ol i gat nid long wokim nupela mog hariap. Gavana Juffa i tok moa olsem i tru em i mas karim risponsibiliti long dispela wok em tasol em i impoten tu long klia bilong wanem tru na dispela wok i no surik yet. Em i kisim infomesen pinis olsem NDOH i salim disain bilong nupela mog i go pinis long PHA na em i laik save husat i go pas long dispela wok, bilong wanem na wok i no surik na sapos wanpela i no mekim wok bilong em, em i laik save bilong wanem as tru? Em I kisim infomesen tu olsem Sekta Siaman bilong Helt na Provinsal Edministreta bai I holim wanpela bung long dispela wik long bekim ol askim bilong em.