NDOH mekim wok painimaut long marasin SEVENPELA pipel i dai pinis long Pot Mosbi Jeneral haus sik bihain long ol i kisim wanpela marasin ol i kolim Propofol Sut IP 10MG/ML long 20ML VIAL (1%/V).

Nesenel Dipatmen bilong Helt (NDOH) i putim aut wanpela toksave pinis long ol

haus sik long lukaut long dispela marasin. Nem bilong marasin em Propofol Injection IP 10MG/ML long 20ML VIAL (1%V). Ol lain i wokim dispela marasin em Cooper Pharma Limited, India. Batch na Lot Namba em LE21007. Deit ol i wokim dispela marasin em 04/2021. Deit strong bilong dispela

marasin bai i pinis em 03/2023. Insait long wanpela Circular bilong NDOH long Tunde Ogas 17, 2021 Helt Sekreteri Dokta Osborne Liko i tok ol i mekim wanpela wok painimaut nau long wanpela prokiumen bilong marasin ol i bin yusim long dispela ol sik manmeri na pikinini. NDOH ilukim dispela olsem wanpela bikpela hevi tru na em bai i askim olgeta tim long wok bung wantaim em long painim as bilong dispela hevi. Long dispela taim tu em i askim olgeta haus sik, pablik na praivet, long Papua Niugini long luksave long dispela marasin na putim long kwarentin.