WOK bilong gavman em i bilong putim ol veksin long olgeta haus sik bilong yumi. Praim Minista James Marape i tok, “Em i laik bilong wan wan man o meri long kisim veksin long palamen long Tunde Ogas 17.” Em i tok, “Ol kampani i gat polisi na sefti hap we ol i mas bihainim long ranim dispela kampani bilong ol gut.

Bihain long lida bilong oposisen i askim long ol kampani i mekim veksin i kamap namba  wan samting long ol wok man. Praim Minista i tok,  ol kampani i save wok aninit long kampani lo bilong ol. Wanem samting ol i tok na i ting olsem em bai helpim kampani bilong ol, mipela i nogat tok long dispela. Mipela  mas save olsem wan wan man i gat rait bilong ol i stap. Wanpela man i bai laik long kisim veksin na narapela bai les long kisim. Tasol yumi mas tingim rait bilong husat i pret na laik banisim em yet long kisim COVID-19. Mipela i gat 4-pelal kain veksin we World Health Organisation (WHO) i tok orait pinis long en. Gavman i bai helpim long karim ol dispela veksin i go na bai stap long olgeta hap long kantri na ol pipel i ken kisim. Nogat wanpela bai tok strong long ol pipel bai kisim veksin. Wan wan man na meri  bai mekim disisen bilong ol yet.

Samantha Solomon i raitim