HELT na HIV/AIDS Minista Jelta Wong i tok nau yet K3.1 milien mani bilong coronavirus (COVID-19) tasol i stap long akaun.

Wong i tokaut long dispela long palamen kibung long Tunde dispela wik taim em i tokaut long Helt Ripot bilong em. Dispela long K1.8 bilien mani na helpim em Dipatmen bilong Helt i kisim long gavman na helpim em ol divelopmen patna olsem Australia, Nu Silan, Japan, Saina,

Frans na Amerika i givim. Wong i tok long K1.8 bilien, K115.6 milien i kam long gavman bilong Papua Niugini na K906.6 milien i kam long ol divelopmen patna. Em i tok planti bilong mani em ol divelopmen patna i givim i kam long ol samting ol i baim pinis olsem masin bilong pulim win, pesenel protektiv ikwipmen, ol medikal ikwipmen na ol arapela samting bilong wok long haus sik. Dipatmen i kisim K58.6 milien mani stret long ol divelopmen patna olsem Wol Benk, Intenesenel Moniteri Fan (IMF) na sampela long ol kantri ol i kolim pinis. Bungim dispela mani wantaim K155.6 milien em gavman i kisim i kamap long K172.2 milien. Long dispela mani, gavman i yusim pinis K898,580,000 (K899 milien). Dispela mani Helt Dipatmen i menesim dispela mani aninit long Helt Sekta Impruvmen Program Tras Akaun (HSIPTA). Long dispela mani em i yusim K13.9 milien long karimaut COVID-19 program. Ol arapela mani olsem K74.3 milien i go long ol provinsal Atoriti na Pot Mosbi Jeneral Haus sik long yusim long wok bilong COVID-19. Dipatmen i makim pinis narapela K39.9 milien long givim HSIPTA long wok bilong veksinesen. I gat olsem K10 milien i stap bilong Dipatmen i givim long Pot Mosbi Jeneral Haus sik na ol provinsal helt atoriti bihain long em i kisim ripot bilong mani long ol. Narapela K9.4 milien i stap aninit long Dipatmen bilong Foren Afeas na Tred long wokim veksin rolaut program na K1.25 milien long ol wok bilong Nesenel Kontrol Senta (NCC), K12.9 milien long baim ol samting bilong baim pait egensim COVID-19 bihain long prokumen plen. Long olgeta gavman mani na helpim gavman i kisim, inap long K3.1 milien em, Dipatmen i no makim long mekim wanpela samting na i sindaun nating long HSIPTA akaun.

Nicky Bernard i raitim