MINISTA bilong Edukesen, Jimmy Uguro i tokaut long ol skul het tisa na bod ov menesmen siaman long olgeta skul long kantri long no ken rausim ol sumatin long skul bikos gavman i peim tusen fi fri (TFF) mani bilong namba tri na namba foa skul tem pinis.

Minista Uguro i givim dispela toksave taim em i bungim ol pipel bilong wod tu bilong Gama Lokal Level Gavman (LLG) long las wik Sarere arere long Ramu wara. Dispela toktok i kamaut long maus bilong Minista bilong Edukesen yet na em i tok gavman i luksave long hevi na hatwok ol papamama i save bungim long painim mani long peim skul fi

bilong pikinini bilong ol olsem na em i rilisim mani long hepim. Minista Uguro wantaim Distrik Edministreta bilong Usino-Bundi, Steven Bikona Presiden bilong Usino LLG, Peiwa Aimai wantaim ol nius lain i bin go long Wara Laplap long wod tu long Gama LLG we i lukim MP Uguro i givim ol kapa na somil wantaim senso na tu ol spots yunifom long dispela rurel komyuniti. Dispela ples i stap namel long Usino-Bundi na Midel-Ramu long Madang province na Jimi LLG long Jiwaka provins. Minista Uguro i tokaut long ol pipel bilong Gama LLG olsem ol skul i no ken rausim ol sumatin long skul long tem tri na tem foa.  Em i tokaut olsem gavman i

peim pinis K58milien skul sabsidi grent i go insait pinis long akaunt bilong ol skul. Uguro i tokaut olsem ol mani o grent i karamapim benk akaunt bilong ol fleksibel, open na distens edukesen (FODE), sekenderi skul, nesenel hai skul na vokesinel skul. Minista Uguro i tokaut olsem dispel skul sabsidi grent i bin go long ol akaunt bilong wan wan ol skul stat long Fonde, Ogas 5 na ol papamama i mas save long dispel gutpela nius olsem gavman i stap long helpim ol. Uguro i tokaut olsem long dispel yia 2021 Nesenel Gavman i bin makim olsem K486.3 milien bai go long skul sabsidi bilong dispela yia. Mista Uguro i askim olgeta skul

na ol edministresen bilong ol long yusim gut mani na putim yet long ol praioriti eria we i ken helpim gut tising  na lainim bilong ol sumatin. Em i tok gavman wok strong long mekim wok aninit long wok bung o patnasip wantaim namel long nesenel  gavman, provinsal  gavman, ol Distrik Divelopmen Atoriti, ol papamama, Sios na ol arapela lain stekholda. Em i tok taim olgeta lain i sapotim dispela tusen fri fi polisi bilong gavman em bai wok gut long edukesen  bilong ol  pikinjni na Marape gavman i sanap strong long lukim moa pikinini bilong yumi long PNG i kisim gutpela save na edukesen long kamap olsem gutpela manmeri na lida bihain taim.

James G. Kila i raitim