SAMTING olsem 200 Gret 12 sumatin bilong St. Michael’s Brahman Sekenderi Skul long Usino-Bundi distrik, Madang provins i no sindaun long Gret 12 riten eksaminesin we i bin kamap long Mande long dispela wik.

Dispela long wanem bikhet pasin na pait long Brahman Katolik misin stesin i lukim planti ol wok long stesin i bagarap. Ekting Edukesen Dairekta wantaim Madang Provinsal Edukesen Bod (PEB), John Sigara i tokaut olsem ol dispela Gret 12 sumatin i no bin sindaun long riten eksam bilong ol long mun Jun olsem na ol i no inap sindaun long

bikpela eksaminesen long bihain long dispela yia. Sigara i tok bikos long dispela Gret 12 sumatin bai mekim skul bilong ol na sindaun long eksam long neks yia. Em i tok hevi long Brahman i bin stap namel long ol sumatin na ol lokal lain manmeri na dispela i givim hevi long ran bilong skul. Tasol Minista bilong Edukesen na pastaim sumatin bilong Brahman Sekenderi skul, Jimmy Uguro i no amamas long dispela disisen. Minista Uguro husat i Mema bilong Usino-Bundi distrik we skul i stap i no amamas tu bikos em i no bin kisim wanpela ripot i kam long Madang Edukesen atoriti na skul bod.

Dispela pait we i kamap long Brahman long tripela wik i go pinis nau i givim bikpela hevi we i lukim skul i pas na ol Gret 12 i no inap sindaun long Gret 12 eksam bilong ol. Wantaim dispela, narapela bikpela hevi we i bin kamap em bikpela bagarap i bin kamap long helt post long Brahman Katolik misin stesin. Ripot Wantok Niuspepa i bin kisim long wanpela lokal man bilong Bundi husat i lukim long stat bilong hevi i tokaut olsem wanpela grup man sumatin long Brahman Sekenderi skul i no amamas long wanpela disaplineri disisen skul edministresen i bin mekim na ol i kirapim pait wantaim sampela ol wokman bilong skul. Dispela pait i go bikpela na i surik i go long helt senta na i bagarapim tru ol samting bilong skul. Planti pipel nau i bungim hevi long sait long helt sevis long Brahman bikos long hevi ol sumatin i kamap long stesin wantaim ol lokal lain.

James G. Kila i raitim