OL sumatin bilong Samarai-Murua ilektoret i stap long ol institusen insait long kantri bai kisim ful skul fi long Samarai-Murua Distrik Divelopmen Atoriti (DDA).

DDA long 2018 i bin peim K5 milien tusen fi bilong olgeta sumatin i stadi long Yunivesiti na koles insait long kantri. Lokal MP na Minista bilong Kalsa na Turis Isi Henry Leonard i peim pinis namba wan K1.5 milien bilong K3 milien i go long ol 48 institusen. Na long dispela mani bikpela hap i go long University of Papua New Guinea (UPNG) we 20 sumatin bilong foapela (4) lokal level gavman bilong distrik i stadi i stap. Minista Leonard i salensim ol sumatin long wok strong na stadi hat. “Mi no pusim yuplea tasol mi laik lukim yupela mekim gut long skul wok bilong yupela na mi bilip long human kapital em i rot bilong helpim distrik bilong mipela. Em i tok tusen fri program em i olsem nogat papamama i mas peim wanpela hap bilong skul fi. Distrik opis bai baim skul fi bilong olgeta sumatin. Leonard i tok long Misima na Woodlark main bihain bai kamap na em i laikim ol yangpela long redim yet ol wantaim ol skils na go bek wok insait long distrik. “Samarai-Murua i gat netserel risos antap long graun na long solwara. Dispela yia i luk olsem Woodlark main bai op na ol i ting em i bikpela prodaksen we mipela ting em i bikpela moa long Misima main,” Minista Leonard i tok. DDA tim i visitim tupela Yunivesiti; UPNG na Pacific Adventist University (PAU) we Mista Leonard i toktok wantaim ol sumatin. Ol sumatin bilong tupela Yunivesiti i soim bikpela amamas long Samarai-Murua DDA opis na ol i tingting long wok hat long ol stadi bilong ol long helpim distrik bilong ol pastaim.

Joseph Dawai i raitim