TSEVI Viles long Kome LLG bilong Menyamya i bin kisim nupela dabol stori klasrum, Etpos (Helt Senta) na Tisa Haus long las wik Tunde long Lae Morobe Provins. Dispela projek i bin kam aninit long sapot bilong Morobe Provinsel Gavman (MPG) wantaim lidasip bilong Morobe Gavana Ginson Saonu na Siaman bilong Menyamya DDA Benjamin Philip.

Ol Tsevi Viles pipel i bin amamas na selebret wantaim long taim bilong opim dispela nupela dabol etpos na tisa haus bilding bihain long Morobe Provinsal Gavman i bin givim Sawmil Masin long katim ol timba bilong bildim ol haus. Gavana Saonu i bin go wantaim DDA Siaman Benjamin Philip long opim dispela nupela dabol stori bilding na givim sampela toktok long fanding sapot long ol eria na Menyamya Distrik. Ol fanding sapot i kam long Provinsal Gavman em; 1. K30,000 long Tsevi Praimeri Skul 2. K20, 000 long Tsevi Etpos 3. K1000 long wan wan Tupela elementri skul 4. K250, 000 long stretim Kome rot 5. K100, 000 long Tsevi Mising Link rot (40 mile-TsiliTsili long Menyamya Haiwe) Gavana Soanu i tok dispela K100,000 sapot long mising link rot bai kamap stap insait long baset bilong olgeta yia sapos ol pipel yet wanbel long helpim na wok long dispela rot. Memba bilong Menyamya Benjamin Philip bilong Pangu Party i tok em bin kisim K1 milien long DSIP dispela yia olsem na wok bilong distrik bai kamap. Philip i bin apim nem bilong Gavana Soanu long dispela sapot na amamas long wok klostu wantaim ol Provinsal Het long givim moa projek sevis long Menyamya pipel long dispela tem bilong Gavman.