KONSTITUSEN na Lo Rifom Komisin (CLRC) bodi i gat bikpela tingting long wokim riviu bilong edukesen lo long Papua Niugini bihain long Komisina bilong CLRC Dokta Dora Aiyus na Sekreteri Dokta Mange Matui i bin katim ribon na opim Isu Pepa long las wik Fraide.

Dispela konsaltesen wok bai kamap long olgeta hap bilong kantri long deit 1 i go 21 Ogas, we Enga provins em namba wan long statim dispela riviu wok na bai go pinis long Momase rijon long Lae. Long wankain taim neks mun deit 16 i go 21 Septemba ol CRLC bai surukim wok long Niugini Ailan na pinisim long Pot Mosbi wantaim ol institusen long kantri; yunivesiti, koles, haia sekenderi na ol impoten stekholda husat i wok aninit long edukesen dipatmen. Komisina bilong CLRC Dokta Dora Aiyus i tok astingting bilong dispela wok bilong edukesen lo em long wokim konsaltesen wantaim wan wan stekholda husat i wok aninit long edukesen dipatmen na painimaut long wanem kain ol isu o hevi i save bagarapim rot bilong edukesen. Sekreteri bilong CLRC dipatmen Dokta Manga Matui i tokaut olsem dispela em bikpela wok long givim lo bilong rifom long ol pipel na konsaltim ol wan wan, olsem na gutpela CLRC dipatmen kamap wantaim isu pepa long painimaut ol isu o hevi insait long edukesen proses. “Edukesen em proses bilong laip bikos em impoten long PNG na

mipela i mas gat gutpela rifom edukesen lo long lukautim sistem bilong kantri,” Dokta Matui i tok. “Planti pasin korapsen i wok long kamap insait long edukesen sistem na tu long wan wan stekholda husat i makim provins na ol skul i mas tokaut long wanem kain hevi bagarapim skul proses,” Matui i tok. “Astingting bilong dispela wok salens em long go aut na konsaltim ol pipel long graun na bungim

olgeta isu o hevi bilong ol pastaim long wokim fainel ripot na bringim go long palamen long pasim dispela lo,”Komisina Dokta Aiyus i tok. Dispela wok em impoten olsem na edukesen dipatmen i mas soim interes long wanem samting CLRC i laik wokim long dispela yia. Na ol bai bihainim proses long givim lo rifom riviu long ol pipel na konsaltim ol beis long isu pepa bilong ol.

Jacklyn Kimala i raitim