LONG wik i go pinis Intanesenel Treninig Instatut (ITI) i kisim K20, 000.00 long Kokopo distrik edministresen aninit long Kokopo distrik skul fi sabsidi program.

Man i go pas long dispela program Fedelis Nichalaus i tok olsem dispela program em i bilong helpim ol sumatin  long peim skul fi bilong ol we ol i bin statim eitpela krisma i go pinis.

Mista Fidelis i tok olsem “mipela helpim long bildim human risos kapitel bilong Kokopo distrik na Is Nu Briten wantaim.

Em i tok moa olsem ol dispela sumatin husat i pinis skul, save ol i kisim long ITI bai helpim sindaun bilong ol na tu bai helpim long groim ikonomi o wok bisnis bilong Kokopo distrik na Is Nu Briten wantaim.

Dispela program em bipo memba bilong Kokopo Ereman ToBaining Junior i kirapim na nau em yet i sapotim long karimaut dispela program long gohet na helpim ol sumatin bilong Kokopo distrik.

Em i tok Kokopo distrik edministresen i tok orait long mani mak olsem K800,000.00 long helpim long peim skul fi bilong ol sumatin bilong Kokopo distrik.

Ol i givim tu K20,000.00 bilong helpim ol sumatin bilong Kokopo husat i skul long ITI Kokopo na ol arapela provins.

Fidelis i tok dispela em i sapot program bilong Kokopo distrik we ol papamama bai peim hap bilong skul fi bilong pikinini bilong ol.

Bos bilong ITI long Kokopo Michael Novingu i tok tenkyu long Kokopo distrik edministresen long dispela helpim ol i givim.

Mista Novingu i tok olsem ITI bai wok bung wantaim ENB Provinsal edministresen na Kokopo distrik long lukim olsem ol sumatin i pinisim skul bilong ol na kisim gutpela pas mak.

Michael Novingu i raitim