MOA long 700 sumatin i graduet long Mapex Trening Institut (MTI) wantaim setifiket na diploma long las wik long kain kain kos ol i bin stadi long em long las 6-pela mun.

Planti bilong ol dispela sumatin i bin drop aut long ol gavman skul na ol i kisim namba tu sans long mekim laip bilong ol i kamap isi.

MTI Ekseketiv Dairekta Marcus Kara i tok planti bilong ol dispela sumatin i bin baim skul fi bilong ol yet.

Tasol em i tok i gat ol koporet sponsa husat i save stap wantaim ol tasol dispela institut i helpim ol long mekim samting i kamap isi.

Wanpela bilong ol em Sauten Haileans Provinsal Gavman i save luksave long nids bilong ol yanpela manmeri long mekim laip bilong ol i kamap gut na long dispela as 9,000 sumatin o yut bilong SHP i kisim trening na skils long dispela skul.

SHP Gavana William Powi husat i bin ges spika i salensim Dipatmen bilong Edukesen long luksave long ol nids bilong ol yangpela husat i lusim skul na painim kain skul long kisim helpim.

“Yu no turangu. Yu inap mekim senis tasol yu yet yu no save wanem samting yu inap mekim long helpim yu yet,” Powi i tokim ol sumatin.

Em i tokim ol sumatin long tingting go het long wanem samting ol inap long wokim long strongim ol yet na was long ol ausait pipel long no ken go kisim nating ol samting bilong ol olsem ol maining kampani.

“Kamapim ol plen long laip na mekim wok long helpim yupela yet na famili na komyuniti bilong yupela.

“Marape-Basil gavman i statim SME program olsem na yu ken putim liklik mani insait long poket bilong yu na kamap narapela kain manmeri long bihain taim.

Gavana Powi i tokim ol sumatin long lukim gut wanem samting bai ol inap wokim long bihain taim bilong ol.

Em i tok tenkyu long MTI long givim dispela kain save long ol yangpela na long givim em sans long tokaut long sampela tingting.

MTI bai kisim ol nupela sumatin long Ogas bihain long ol plant moto kat sumatin i greduet.

Joseph Dawai i raitim