LONG Trinde Julai 6, Namba wan Sekreteri bilong Australia Hai Komisin Mis Alison Edye i bin go long Haisi Praimeri Skul long Siwai Distrik, Saut Bogenvil long launsim wanpela sola lait projek bilong skul.

Dispela projek em kamap aninit long Bogenvil Patnasip we ol gavman bilong Australia, New Zealand, PNG na ABG yet.

Ol i bin tok orait long dispela long  projek  long 2014 yet  tasol sampela wok redi i no bin kamap gut olsem na projek i kisim longpela taim. 

Dispela projek i kamap long mani mak bilong K80,000 na wanpela kondisen bilong en em olsem ol komyuniti husat bai benefit long dispela projek mas kamap wantaim 10 pesen bilong olgeta kost. Long bihainim dispela kondisen Haisi Praimeri skul bod ov menesmen i bin kamap wantaim K8,000. Dispela mani em man husat pastaim i bin Rijinol Memba bilong Bogenvil Joe Lera i bin putim.

Pastaim long em i launsim projek Mis Edye i tok olsem, em i amamas tru long kam long Haisi long lukim ol pipel i wok hat tru long mekim kamap ol samting long impruvim laip bilong ol.

Em i tok strong long ol pipel long sapotim wok kamap na pis long Bogenvil, na Australia bai stap long givim sapot.

Em i tok moa olsem Australia i bin sapotim Community grants program long Bogenvil long longpela taim, na i bin kisim moa long 100 aplikesen tasol ol i bin inap long givim mani tasol long ol 60 projek, na dispela em  i wanpela long ol dispela projek.

Misis Pauline Wabi, Het Mistress bilong Haisi Praimeri skul i tok tenkyu long ol pipel bilong Australia long sapotim edukesen bilong ol sumatin bilong Haisi. Em i tok dispela ol lait bai helpim ol sumatin long skul bilong ol na ol tisa long redim gut ol program bilong ol.

Meri husat i bin makim ol meri Rachael Pukuru em i tok olsem dispela pawa bai helpim skul long painim sampela mani taim ol salim ol samting olsem ol kol dring, aiskrim na aisblok.

Siaman bilong Motuna Huyono Tokunutui Komyuniti Gavman, we Haisi Praimeri Skul i stap insait long em, Aloysius Luku  i tok tenkyu tru long Australia long sapotim ol projek olsem na i bin askim Australia long no ken stop bikos ol dispela helpim i wok long kamapim ol wok kamap o divelopmen long ol komyuniti i stap ausait long ol taun.

Em i toktok long wanpela toktok bilong Blak America man, Dr. Martin Luther King husat i bin tok; "Mi gat wanpela driman . . ." (I have a Dream . . ." ) na em i tok driman bilong em i stap olsem wanpela de bai Bogenvil bai kamap long standet bilong America na Australia na dispela bai kamap wantaim helpim bilong ol kantri husat i develop pinis.

Haisi i gat pinis wanpela praivet WiFi we wanpela famili bilong kantri New Zealand i bin helpim long baim na sanapim. Wanpela wanpisin bilong ol i bin wanpela pailat long Royal New Zealand Air Foprce na balus bilong em i bin pundaun long wanpela hap klostu tasol long skul.

 Ol lain bilong Haisi husat i save stap long PNG, Australia na New Zealand i bin inap long lukim dispela launsing live bikos Facebook pes bilong ol Haisiconnect (o Haisi Update) i bin wok long salim ol dispela piksa na toktok taim ol yusim dispela WiFi bilong ol.

Dispela Sola Projek i givim pawa long 5-pela haus tisa , 8-pela klasrum, wanpela laibri na tu em pawarim ol lait long banis.

Paul Wagum i raitim