OL PEDIATRISEN o dokta bilong ol pikinini long PNG i gat bikpela bel-wari na pret nau i stap olsem sapos wanpela bikpela sik i kamap na i go bikpela long kantri, bai planti pikinini krismas bilong ol i daunbilo long faiv krismas i ken dai.

Sif  Pediatrisen long Madang Jeneral Haus Sik, Dokta Jimmy Aipit i tokaut long dispela taim em i toktok wantaim ol nius lain long Madang long las wik.

Dokta Aipit i tokaut olsem wanpela helt pefomens riviu ol i bin wokim long Madang i soim olsem namba bilong ol pikinini i kisim veksin o banis sut stat long las yia na i kam long dispela yia i pundaun i go daunbilo tru long 20 pesen mak.

Em i tok 20 pesen mak em daunbilo tru na wanem samting i kamap long Madang em i wankain long ol helt klinik rekot bilong ol arapela provins long PNG tu.

Dispela em bikos ol mama na famili i pret long bringim ol pikinini long kisim veksin bikos ol i no laikim veksin bilong sik COVID-19.

Dokta Aipit i sutim tok long sosel midia long bringim pret long ol papamama bilong ol pikinini na ol i no bringim ol i go kisim ol bebi sut o veksin long banisim sik. Na dispela em wanpela bikpela helt hevi kantri i ken bungim long bihain taim.

Em i tok infomesen ol i kisim i tokaut olsem planti papamama i pret tasol long bringim ol pikinini i go long helt klinik long kisim veksin bikos ol i tok nogut ol helt woka i givim ol veksin bilong COVID-19.

Dokta Aipit i tokaut olsem sampela taim i go pinis polio autbrek i bin kamap na long 2015 sik misels autbrek i bin kamap.

Em i tok nau wantaim kain kain pret toktok i kamap long sosel midia na ol lain husat i ritim na mekim paul toktok i bringim pret long ol mama na famili bilong ol liklik pikinini long karim ol i go long helt klinik long kisim bebi sut.

Dokta Aipit i tokaut olsem taim mama i karim bebi ol i nogat banis egensim ol sik olsem na ol dokta na helt wok lain i save givim sut long banisim ol bebi long kisim sik olsem nimonia (kol-sik), misels, polio, pekpek wara, kus sotwin o epetaisis, meninjaitis na ol arapela sik.

Em i tok dispela em ol strongpela sik we i ken bagarapim ol bebi. Olsem na taim ol i kisim banis sut em bai banisim ol long kisim sik.

Narapela samting Dokta Aipit i tokaut long en em taim ol helt woka i go aut long mekim ol nomal helt patrol long ol rurel ples long givim banis sut long banisim ol arapela sik, ol lain long ples i save rausim ol na ranim ol i go aut na i tok strong olsem ol helt woka i giaman tasol long bringim COVID-19 sut marasin i go long givim pikinini bilong ol.

James G. Kila i raitim