BINATANG Delta bilong COVID-19 o ol i kolim COVID-19 Delta i stap pinis long Papua Niugini.

Deputi Kontrola bilong PNG COVID-19 Nesenel Pandemik Rispon, Dokta Daoni Esorom i tokaut long las wik Fonde long wanpela namba wan keis bilong COVID-19 Delta em wanpela  65 krismas man na em bilong Filipins i bin kisim.

Dokta Daoni i tok dispela keis i nau stap long Pacific International Haus sik (PIH) na em i stap orait.

Dispela positiv Delta keis man em i kepten bilong wanpela kago sip ol i kolim Grand Tajima. Kago sip Grand Tajima i lusim Indonesia long Jun 26, 2021 na i kam kamap long Pot Mosbi long Julai 7, 2021. Taim ol i kam yet long sip, kepten i bin pilim sik.

Dokta Daoni i tok dispela sip i bin i go sua long ol arapela kantri we i gat ol keis bilong COVID-19 delta bipo long em i kam sua long PNG olsem na ol i karimaut ol strongpela kwarentin proses long dispela keis. Ol i haitim em gut tru na karim em i go long PIH we ol i mekim test long en na risal i soim olsem em i positiv long COVID-19 Delta.

“Long stat yet mipela i tritim dispela keis olsem em i mas wanpela COVID-19 Delta keis olsem na mipela i bin bihainim gut ol strongpela na gutpela mesa long tritim dispela keis. Taim risal bilong en i kam aut olsem em i positiv, mipela i bin wet tasol long ol lain long Australia long mekim moa test gen antap long dispela.

“Long nain kilok moning long las wik Fonde, toksave i kam long Australia olsem dispela sip kepten em i gat COVID-19 Delta. Em i stap yet long PIH.

“Long kisim was ol sikispela lain husat i bin bihainim kepten i go long arere long wanpela bot i go stap insait long kwarentin kwiktaim. Faivpela bilong ol dispela sikispela lain em ol lain long PNG yet na wanpela em bilong Filipins,” Dokta Daoni i tok.

Dokta Daoni i tok olgeta sikispela i no gat COVID-19 tasol ol i bai go het long mekim ol arapela moa test. Na sip tu i stap long kwarentin long solwara ausait long Pot Mosbi.

Em i tok dispela kago sip Grand Tajima i kam kamap long PNG wantaim 16 lain. Long dispela, 6-pela em ol i gat COVID-19.

“Ol dispela sikispela lain i no gat COVID-19 Delta tasol ol i gat COVID-19. Tupela bilong ol i kisim bikpela sik na i stap long aisolesen wod bilong Pot Mosbi Jeneral Haus sik. Ol arapela 4-pela husat i no sik tumas i stap long sip Grand Tajima wantaim ol arapela 8-pela husat i nogat COVID-19 o COVID-19 Delta.”

“Ol atoriti olsem Dipatmen bilong Helt na Nesenel Maritaim Atoriti i stap klostu long ol lain i stap long sip long dispela taim. Toksave i go pinis long Embesi bilong Filipins long ol sitisen bilong en i kisim COVID-19 na i stap we,” Dokta Daoni i tok.