OL VILES Helt Volintia (VHV) long Kokoda Trek Rijon i redi long holim disabiliti asesmen bihainim wanpela trening bilong givim ol besik helt kea sevis long ol lain husat i disabel.

Moa long 50 VHV i bin stap insait long wanpela wik trening long Sogeri, Sentral Provins na long Kokoda long Noten Provins. Ol trena long Callan Service Nesenel Yunit bilong ol disabel long Pot Mosbi i go pas long dispela trening.

Australia Gavman na Gavman bilong PNG i sapotim dispela trening aninit long Kokoda Initiative Partnership.

Ol VHV i lainim long luksave long ol disabel na salim ol i go long ol speselis bilong ol.

Ol i kisim trening tu long yusim ol teknik o stail bilong luksave long ol lain husat i no harim na lukim gut na ol arapela fisikal disabiliti tu. Ol teknik bilong luksave long ol lain i gat disabel em kain olsem skelim ol lain taim yu lukluk long ol na mekim sampela askim long luksave gut.

Nesenel yiau na ai trena bilong Callan, Desmond Taboeya i tok ol VHV bai kamap ol franlain woka long helpim ol disabel long komyuniti bilong ol.

“Ol viles helt voluntia i save stap long komyuniti na long trek na em ol dispela lain husat i bai inap long luksave kwiktaim husat i disabel na salim ol i go long ol speselis,” Desmond i tok.

“Dispela bai givim sans long ol disabel i ken kisim helpim we i ken strongim ol long helpim komyuniti ol i stap long en wankain olsem ol nomol manmeri na pikinini.”

Tasol em i tok Kokoda trek i stap insait tru na i hatpela ples na dispela i save bringim planti salens long ol komyuniti long dispela hap long kisim ol sevis bilong disabiliti.

Callan Service i save wok wantaim Kokoda Initiative aninit long ol raun bilong helt bilong ol mama na pikinini long mekim ol disabiliti asesmen long 90 viles i stap long trek. Ol i bai sekim na testim ol 60 skul na 14 helt fesiliti we Kokoda Initiative i sapotim long en na bungim ol helt woka, ol tisa na ol viles helt volintia long apim mak bilong ol disabiliti sevis.