MOA infomesen na save long coronavirus i wok long kamap ples klia nau.

Ol helt saientis i tok ol sain bilong COVID-19 em; kus we i no laik stop, skin i hat, i no inap smelim samting o kisim teist bilong kaikai.

Ol risetsa i tok tu olsem long sampela pipel, COVID-19 bai i olsem wanpela kol sik tasol kus na nus I wara wara.

Na ol i tok strong olsem sapos yu ting yu gat COVID-19, em i impoten tru long yu go kisim tes. Maski sapos yu no pilim sik tumas, yu ken putim ol arapela long hevi bilong dispela sik.

Sapos yu gat fiva, em coronavirus? Yu ting yu gat kol sik, flu o coronavirus? Bai yu save olsem wanem?

Wanpela gutpela rot long save em long sekim skin hat bilong yu. Sapos tempresa masin i soim olsem skin bilong yu em i hat long mak bilong 37.8C o antap orait yu mas tingting. Kain fiva olsem em i soim olsem bodi bilong yu i paitim sampela infeksen. I no coronavirus tasol.

Long Pot Mosbi na sampela taun i gat ol tempresa masin i stap long dua bilong ol stua. Em i fri long sekim skin hat. Sapos skin i hat tumas(abrusim mak bilong 37.8C) em i no kus o kol sik nating. Yu mas go kisim tes.