LONG 29 Julai, 2021, ol AstraZenecca veksin o banis sut bilong COVID-19 bai ekspaia o bagarap olsem na ol manmeri husat i gat tingting long kisim banis sut i mas i go na kisim, long wanem,  taim dispela ol banis sut i ekspaia, em ol bai i no gat yus bilong ol.

Dispela em i sampela strongpela toktok Dairekta bilong Pablik Helt Sevises long Isten Hailans Provinsal  Helt Atoriti, Dokta Max Manape i mekim long taim em i bin kamap long Aiyura long mekim edvokesi na awenes kempen long ol wokmanmeri bilong Coffee Industry Corporation na ol lokol fama.

“Sapos yupela i harim planti kainkain stori long stopim yupela long kisim COVID-19 banis sut, em yu bai kisim rong tingting. Banis sut em i seif long kisim na em i no inap kamapim ol kainkain hevi long bagarapim yupela. Banis sut em bilong banisim yupela long sik COVID-19,” Dokta Manape i tok.

Em i tok EHPHA i kamapim pinis ol COVID-19 veksinesen senta  long 8-pela distrik bilong Isten Hailans na putim ol wokmanmeri long mekim wok bilong givim banis sut bilong COVID-19.

Taim dispela ol samting i kamap, EHPHA i mekim planti edvokesi na awenes kempen long lokol redio na ol arapela midia tu. Tasol ol liklik lain tasol i wok long i go na kisim sut.

“Taim EHPHA i lukim olsem taim i wok long suruk i go klostu long de bilong Astra Zenecca veksin i ekspaia, mipela i kamapim narapela tingting. Na dispela em long bringim dispela ol banis sut i go long haus dua bilong ol bikpela institusen na bisnis haus na yusim ol dispela banis sut bipo long ol i ekspaia”, Dr. Manape i tok.

Em i tok nau yet COVID-19 rispon tim bilong EHPHA i mekim ol raun we ol i go long haus dua bilong dispela ol institusen na bisnis haus long Goroka na Kainantu long givim dispela COVID-19 banis sut long ol wokmanmeri.

Dokta Manape i tok EHPHA i wok long mekim olsem, long wanem, em i laikim olsem ol manmeri i mas kamap na kisim marasin long laik bilong ol yet, na dispela em bai i ken helpim long stopim spred bilong COVID-19 na ol lokdaun pasin long provins.

Sape Metta i raitim