WANPELA nupela ples bilong karim pikinini na wanpela dipatmen bilong ol Patoloji na sik pikinini i op long ANGAU Memorial Haus Sik long Lae, Morobe Provins.

Minista bilong Intenesenel Divelopmen na Seneta bilong Pasifik long Australia, Zed Seselja i kam long namba wan taim bilong en long Papua Niugini na Lae long opim dispela ol nupela fesiliti long Angau Memorial Haus Sik na tu lukim ol arapela konstraksen wok i kamap long dispela haus sik.

Hai Komisina bilong Australia, Jon Philp na Helt Minista, Jelta Wong i kisim Seneta Seselja i kam.

Memba bilong Lae, John Rosso i makim maus bilong ol pipel long Lae na Morobe provins na tok tenkyu long Gavman bilong Australia aninit long Dipatmen bilong Foren Afeas na Tred (DFAT) na PNG Australia Patnasip long ol dispela nupela fesiliti insait long ANGAU.

Em i tok  tenkyu tu long helt dipatmen na gavman bilong PNG na ol arapela stekholda husat i putim han long kamapim gutpela helt bilong ol pipel long Lae na Morobe provins na ol arapela provins i stap klostu.

“Ol dispela fesiliti bai helpim ol pipel long kisim ol medikol helpim long Lae yet na bai no gat nid long i go painim long narapela hap.

“Mi tok tenkyu tu long Morobe Provinsal Helt Atoriti long driman na hatwok bilong ol long apim helt sekta long Lae,” John Rosso i tok.

Aninit long bikpela driman na plen long apim helt sekta insait long Lae, wanpela nupela helt senta i nau stap aninit long kostraksen long West Taraka. Dispela helt senta bai gat dental klinik, ples bilong karim pikinini na ol namba wan helt kea.

Wanpela K12 milien level 4 haus sik i nau stap aninit long konstraksen long Tent Siti. Dispela konstraksen bai kamapim sikispela nupela haus bilong ol wokmanmeri.

AusAid na Asian Development Bank (ADB) i givim mani long sapotim dispela tupela fesiliti we i nau stap aninit long konstraksen.

“Ol dispela helt fesiliti bai daunim namba bilong ol sikmanmeri na pikinini long ANGAU haus sik na tu helpim ol pipel long kisim helt sevis long haus doa bilong ol.

“I gat ol plen long apim olgeta helt fesiliti long Lae wantaim liklik mani i stap aninit long Lae DSIP helt sekta,” Mista Rosso i tok.