OL senis we i bin kamap long lo bilong raun long balus i go long ovasis na insait long kantri i kamap long sevim laip bilong ol pipel.

Deputi Kontrola bilong COVID-19 Nesenel Pandemik Dokta Daoni Esorom i tok.

Em i singaut long olgeta sitisen long putim laip bilong ol na laip bilong famili bilong ol i go pas na lusim ol arapela bel na tingting long baksait.

Em i strongim ol sitisen long i noken larim ol lain husat i gat ol hait tingting baksait long mekim kainkain toktok na paulim tingting bilong ol. Tasol em i tok ol sitisen i mas ritim gut ol senis i kamap ken long lo bilong raun long balus na luksave gut long astingting bilong ol dispela lo.

Dokta Daoni i tok, ol i mekim ol dispela senis long lo bikos binatang delta bilong COVID-19 i go i kam hariap tru long wol na i stap  pinis long ol kantri i stap klostu long PNG. Ol dispela senis ol i mekim long lo bilong raun bai banisim kantri long strongpela delta binatang bilong COVID-19.

“Mi singaut long olgeta sitisen long luksave gut long ol dispela lo wantaim gutpela tingting bikos ol dispela lo i stap long banisim laip bilong ol na ol famili bilong ol,” Dokta Daoni i tok.

“Taim binatang delta i kilim ol milien manmeri long wol, em i wokmak bilong mipela long banisim laip bilong mipela na ol famili bilong mipela.”

Dokta Daoni i tok, kantri i mas redi oltaim long daunim dispela strongpela binatang bilong COVID-19.