LAS wik PNG University of Technology (Unitech) Lae Skul bilong Nes i opim namba wan haus bilong slip bilong ol sumatin we ol i bin kamapim long Mutzing, Markham Distrik, Lae Provins.

Dispela haus bilong slip i gat tupela hap we ol man nes sumatin bai slip long wanpela na ol meri nes sumatin bai slip long narapela.

Ol i pinisim dispela wok insait long 6-pela yia bikos, ol i bungim planti hevi we mani i sot na ol i painim hat long pinisim kwiktaim.

Ol het lain bilong Lae Skul bilong Nes i wok hat tru inap ol i pinisim dispela wok na ol i bin opim long wik i go pinis.

Ekting Prinsipal bilong Lae Skul bilong Nes, Pauline Bomareo, i tok, dispela wok em i wanpela bikpela salens we em i bin bungim long taim em i kisim posisen long yia 2020 i kam inap nau.

“Mi bin lukim ol sumatin nes i kisim bikpela taim long painim haus bilong slip long Mutzing distrik na mi bin wok hat na pinisim dispela wok,” Bomareo i tok.

“Mi ting olsem planti bilong ol pablik manmeri i no klia gut yet long wanem kain rot we ol nes i save bihainim long mekim wok.

“Long mipela yet, dispela progrem i kamap insait long ol hap we klinik i save stap long en, olsem ol bikpela haus sik, ol liklik klinik long ol taun na long ol klinik i save stap long ol hap long ples tu.

“Na dispela em ol sampela salens we ol skul olsem mipela i save bungim long salim ol sumatin i go long prektis long wok nes na lukim stret ol samting ol i save mekim.”

Memba bilong Markham na Deputi Spika bilong Paliamen, Koni Iguan, i amamas na tok tenkyu long Unitech, Dipatmen bilong Helt na Dipatmen bilong Haia Edukesen, Risets, Saiens na Teknoloji (DHERST), na I strongim ol olsem ol wokman na wokmeri bilong helt i mas wok long Markham long olgeta taim.

“Mi tok bikpela tenkyu tru long wanem, yupela i makim Markham long kamapim dispela haus bilong ol wok lain we nau bai yumi i gat gutpela ples bilong ol nes bai kam i stap na lukautim yumi ol pipel bilong Markham,” Iguan i tok.

“Markham i laki tru we mipela i namba wan long kisim dispela DHERST program.

“Mi tokaut na tok klia olsem ol pipel bilong mi bai lukautim gut ol dispela propeti na ol sumatin tu.”

Memba bilong Markham na Ekseketiv Menesa bilong DHERST, Lisa Larry, i katim ribbon na opim dispela haus bihain long ol toktok i pinis.

Philemon Tame I raitim