TEACHING SERVICE COMMISSION (TSC) i bin opim Teachers Information Management System (TIMS) onlain databes bilong ol las wik.

Astingting bilong dispela onlain databes em long kisim infomesen olsem, nem, krismas, posisen, na ples bilong olgeta tisa long Papua Niugini.

Dispela em wanpela bilong planti senis we TSC i mekim long impruvim wok bilong em long kantri.

TSC i bin stat long 1970 wantaim 7, 000 tisa tasol. Ol rekot na fail bilong ol dispela tisa tude ino moa stap. Tasol tude i TSC i lukautim 68, 000 tisa long kantri na sampela i woklong greduet yet. Olsem na TSC i kamap wantaim tingting bilong rekotim ol fail bilong olgeta tisa onlain long TIMS.

“ TSC em wanpela bikpela han bilong gavman we i no bin gat databes  long longpela taim inap tude. Planti tisa i save mekim long laik bilong ol bikos i nogat gutpela fail rekot bilong ol,”  Siaman bilong TSC Samson Wangihomie i tok.

Em i tok TSC i mas gat data na infomesen bilong olgeta tisa long kantri. Em i tok amamas long olgeta lain i husat i bin wok hat long kamapim dispela nupela program.

 Nau olgeta tisa bai gat rekot na fail insait long TSC. Dispela i mekim wok isi na TSC i ken isi long trekim ol tisa husat i stap long olgeta kona bilong kantri.

Siaman Samson i askim olgeta tisa long go het long pulumapim infomesen pepa bilong ol na salim i go long TSC bai ol i ken putim i go insait long TIMS.

Seketri bilong Edukesen, Dokta Uke Kombra i tok “em i plen bilong God long yumi kam bung tude long selebretim dispela impoten de bilong TSC na ol tisa bilong yumi long PNG.”

Em i tok em wok bilong TSC long lukautim gut ol tisa bilong yumi. Moa yet ol tisa i stap long rurel eria. Em i tok amamas tru long TSC long kamapim databes bilong ol tisa long kantri.

Nau em wok bilong TSC long kisim infomesen bilong olgeta tisa na putim long data. Taim wanpela tisa i bungim krismas bilong em long pinis wok, TSC bai save na stretim pepa bilong em long pinis wok.

Carolyne Ketsimur i raitim