COVID-19 I salensim planti sumatin na ol i tok ol i hat tru long mekim ol skul wok ol yet.

Taim ol i stopim ol skul long namba wan taim tru COVID-19 i kam long Papua Niugini ol sumatin i bin painim hat tru long mekim skul bilong ol yet na nogat tisa i helpim ol.

Ol i traim long yusim ol samting olsem moodle, zoom na google klasrum tasol  em i no helpim tumas. Ol sumatin i no bin yusim ol dispela intanet samting pastaim. Ol i painim hat tru long wok wantaim ol dispela samting.

Wanpela tisa bilong University bilong Papua New Guinea (UPNG) Brian Tobia i tok taim COVID-19 i kam long Papua Niugini em i mekim mi long lainim ol sumatin wantaim helpim bilong intanet. Lainim ol sumatin wantaim ol samting bilong intanet olsem Moodle i no bin wok gut.

Taim mi traim long salim ol pepa wok wantaim ol asainmen i go long ol sumatin, sampela bilong ol sumatin i painim hat long mekim wok wantaim. Dispela i mekim mi painim ol narapela rot olsem email na whatsapp long salim ol wok.

Wanpela sumatin husat i stadim Geology long UPNG Boya BOYA i tok, “Planti taim ol onlain klas i no save helpim taim intanet i no wok gut. Long PNG intanet I save wok isi isi tru na long skul onlain em wanpela salens. Ol tisa i givim ol tes onlain na taim intanet i no wok gut em i mekim mipela i hat tru long mekim tes long taim.”

Dispela yia em I yia bilong Boya long mekim prektikel. Tasol em i tok, “COVID-19 i stopim em long go long Kainantu long mekim prektikel bilong em. 

Em i tok em i nid tru long mekim dispela prektikel long pinisim gut stadi bilong em long Geology.”

Naraplea sumatin bilong UPNG husat i mekim yia 4 bilong em Esther Gahane i tok em i save lainim samting gut taim ol tisa i save kam long klas na givim skul. Wantaim ol lokdaun na nupela pasin mi no lainim inap samting.

Ol arapela sumatin i stap long dispela mak tu. Ol i save lainim gut samting taim tisa i toktok long ol long wanem samting ol bai nid long lainim. Ol i tok,  taim ol i traim long lainim ol yet long ritim ol pepa na mekim eksesais na asainmen ol yet em i salens.

Sampela bilong ol sumatin i widro pinis na go bek long haus taim ol i hat long ketsap wantaim ol skul wok bilong ol.

Samantha Solomon i raitim