LAS wik PNG gavman i bin stopim wanpela balus bilong India long kam long PNG. MINISTA bilong Helt Jelta Wong i tok PNG gavman i tok nogat long em i kam long abrusim dispela nupela binatang ol i kolim COVID-19 Delta we i wok long kilim planti manmeri na pikinini long India.

Minista Wong i tok dispela balus tu i no bihainim gut ol protokol bilong kam insait long kantri na gavman i stopim ol. Gavman bai i mekim moa wok long banisim dispela kantri.

“Delta em i wanpela nupela binatang na   em i moa strong na i wok long kilim ol pipel i stap na em i no seif bilong kantri Papua Niugini,” Minista Wong i tok. Gavman bilong mipela bai no inap long wok wantaim dispela kain sik long sait bilong stopim ol wok olsem bisnis, skul na gavman opis.

Minista Wong i tok, olsem wanpela kantri i divelop yet i gat bel sori long India tasol mipela mas stopim ol long kam long hia long stopim dispela sik  long kam long kantri bilong yumi. Bikpela namba man meri i kisim dispela sik long India na long wanpela de ol i kisim namba mak olsem 50,000 manmeri i wok long kisim dispela sik.

Em i tok moa, mipela i lukim bikpela namba manmeri i wok long dai long India na long Australia i gat stop long olgeta wok olsem bisnis na skul taim ol lain i go kwarentin i kam aut na sik i go long narapela man na meri.

Gavman i mas no ken larim dispela balus bilong wanpela kantri we dispela sik i kilim planti lain manmeri i kam insait long PNG.

Minista Wong i tok wanpela rot tasol long Papua Niugini na ol narapela kantri long mekim ol samting wantaim nogat tambu em ol i mas kisim sut.

Ol lain husat i kisim dispela veksin i no kisim dispela sik long Australiq na ol lain i no kisim sut i wok long kisim sik COVID-19 Delta.

Minista Wong i tok, taim bikpela namba manmeri i kisim veksin em bai helpim long stopim dispela sik long kam insait long kantri. Yupela i mas toktok wantaim ol famili bilong yupela na kisim dispela sut. Em i gutpela bilong laip bilong yu na famili bilong yu. Em i laik bilong yu sapos yu laik kisim yum as kisim.