Wanpela nupela kain binatang bilong COVID-19 we i kamap long India i nau i go pinis long planti arapela kantri long wol na i bagarapim laip bilong ol milien manmeri na pikinini.

Deputi Kontrola bilong COVID-19 Nesenel Pandemik Rispons, Dokta Daoni Esorom i tok dispela nupela binatang bilong COVID-19 ol i kolim delta em i moa strong long Alpha binatang.

“Dispela nupela binatang bilong COVID-19 em i strong tumas olsem na yumi mas kisim was na i stap. Em i no kam yet long kantri tasol em i bikpela birua bilong yumi long nau. Sapos em i kam long kantri bai Nesenel Kontrol Senta i mekim klia long pablik tasol nau yet em nogat,” Deputi Kontrola Dokta Esorom i tok.

Em i strongim ol manmeri long kisim ol banis sut bilong AstraZenecca long banisim ol yet long dispela sik.

Long wankain taim Kontrola bilong COVID-19 Nesenel Pandemik Rispons, David Manning i tok ol pikinini aninit long 18 krismas bai no inap long kisim banis sut. Em i tok tu olsem em i rispektim rait bilong ol manmeri long mekim disisen long sapos ol i laik kisim banis sut o nogat tasol em i tok em i gat wokmak long lukautim kantri na ol pipel long dispela strongpela binatang bilong COVID-19 olsem na em i singaut yet long ol lain i mas kisim banis sut.

“Mipela bai rispektim rait bilong ol pipel long sapos ol i laik kisim banis sut o nogat. Na bai mipela i helpim na mekim isi long ol lain husat i laik kisim banis sut,” Kontrola Manning i tok.

 Deputi Kontrola Dokta Esorom i tok ol saplai bilong AstraZenecca Veksin i stap long kantri bai ekspaia o bagarap long de 17 na 29 Julai, 2021 na ol 54, 932 pipel tasol long Papua Niugini i kisim AstraZenecca Veksin pinis.

Rebecca Negere i raitim