ISTEN Hailans Provinsal Helt Atoriti (EHPHA) i bin kamapim planti awenes long pablik long Goroka na ol arapela 7-pela distrik long Isten Hailans long kisim veksin (sutmarasin) long banisim ol yet long COVID-19.

EHPHA i putim veksinesen senta long Goroka Provinsal haus sik we ol manmeri em krismas bilong ol i antap long 40 yia i ken go na kisim dispela banis sut.

Tasol planti man na meri i no kamap na yusim dispela senta long kisim dispela banis sut olsem na EHPHA i tingting long bringim dispela veksinesen program i go long ol institusen na haus dua bilong ol wokman na meri long provins, wokim edvokesi na awenes bipo long ol heltwoka bai i ken givim dispela sut.

 Dairekta bilong Pablik Helt Sevis long EHPHA, Dr. Max Manapeito i tok ,“Taim mipela i mekim olsem, mipela i lukim  ol wokman na meri i kamap long kisim marasin long dispela COVID-19 senta long provins.”

Em i tok wantaim helpim bilong Jerald Saleau husat em i wanpela ekspiriens edvokesi na awenes opisa long Institut ov Medikol Risets (IMR) long Goroka, planti man na meri i wok long kisim gut infomesen na ol i wanbel tu long kisim marasin bilong COVID-19.

Dr. Manape husat i bin kisim sampela taim long go aut wantaim ol COVID-19 rispons tim bilong provins long Coffee Industry Corporation (Coffee Research Institute) long Aiyura i tok em i amamas tru long lukim olsem ol menesmen na ol wokman na meri wantaim ol lokal kopi fama long Aiyura i kamap na wanbel tru long kisim COVID-19 marasin.

“Mi amamas long lukim olsem yupela long Coffee Research Institute i wanbel long kisim COVID-19 banis sut. Dispela marasin em long banisim yupela long sik COVID-19. Dispela marasin em i seif long kisim. Em i no inap long kamapim ol sait-efeks olsem planti ol strit-pritsa na sampela ol sios lida i wok long pretim ol manmeri,” Dr. Manape i tok.

Dr. Manape i amamas olsem 22 wokman na meri wantaim ol kopi fama i bin kamap na kisim dispela banis sut long CIC Coffee Research Institute long Aiyura.

Sape Metta i raitim