KENSA Yunit na Pediatrik Wod bilong Pot Mosbi Jeneral Haus Sik (PMGH) i kisim ol gutpela donesen olsem masin bilong givim kolwin, ol ketel, maikrowev, wanpela bikpela TV na Digicel dikoda long CHM long las wik.

Opereting Tiata, Intensiv Kea Yunit na Imejensi Dipatmen bilong PMGH bai yusim ol dispela masin we i save ran long pawa tu.

Papa bilong CHM, Mista Chin i tok CHM i amamas long givim ol samting long wod bilong ol pikinini long mekim envaironmen i nais na i gutpela long ol pikinini, sikmanmeri na ol wokmanmeri insait long wod.

“Olgeta yia dispela tupela wod i save helpim planti laip bilong ol pikinini i bebi tru i go antap long ol pikinini husat i gat kain kain ol arapela sik na tu kain kain ol sik kensa.

“Bikos long gutpela wok bilong ol hatwok nes na dokta long wan wan wod planti laip i save seiv na ol pikinini i save kisim gutpela kea na helpim,” Mista Chin i tok.

“Mipela i amamas olsem sampela bilong ol dispela samting mipela i givim bai ICU, Opereting Tiata, na Imejensi Dipatmen i yusim tu.”

Maus meri bilong bod bilong PMGH, Kathy Johnson i tok kensa yunit bilong ol pikinini em i spesel ples we ol pikinini i save kisim planti helt kea na laikim na taim CHM i givim ol samting long sapotim dispela yunit em i bikpela samting.

CEO bilong PMGH Dokta Paki Molumi i tok, sampela ol pikinini insait long Kensa Yunit na Pediatrik Wod i stap 1-2 krismas bihainim ol tritmen we mipela i putim ol long en antap long sik ol i gat long en.

“Mipela i save helpim ol, givim ol kaikai, na amamasim ol taim ol i stap wantaim mipela olsem na mipela i amamas long CHM long sapot ol i givim long dispela wod,” Dokta Molumi i tok.

PMGH em i bikpela haus sik na em i nidim planti risos long ranim ol operesen bilong en. Tasol em i tok baset we ol i save kisim long gavman i liklik tumas na i no inap long inapim olgeta nid bilong haus sik.

“Olsem na mipela i lukluk long ol arapela rot long helpim haus sik. PMGH i kamapim Friends of POMGEN we i save go pas long painim sapot na donesen long ol bisnis haus na ol bisnis lain na ol arapela grup na ogenaisesen tu.”