GAVMAN bilong Saina i givim 200,000 Sinopharm COVID-19 veksin long Papua Niugini las wik.

Helt Minista Jelta Wong na Praim Minista James Marape i no bin stap long dispela taim long kisim ol dispela veksin, tasol Minista bilong Nesenel Plening na Monitaring na memba bilong Finsafen, Rainbo Paita i bin stap long dispela taim na makim maus bilong Gavman bilong Papua Niugini na kisim ol veksin.

Minista Paita i tok tenkyu long gutpela bel bilong Saina long helpim PNG daunim COVID-19, tasol em i tok em bai lusim long han bilong gavman long givim tok orait long ol dispela veksin bipo long ol pipel i ken kisim.

“Tenkyu long gutpela bel yupela i soim long mipela, long helpim mipela long daunim COVID-19 tasol gavman bilong mipela i gat proses long givim tok orait long ol veksin i kam insait long kantri bipo long ol pipel i ken kisim,” Minista Paita i tok.

Fulnem bilong dispela Sinopharm COVID-19 veksin i kam long Saina em; Inactivated COVID-19 Vaccine (Vero cell). World Health Organization i bin givim tok orait long Me7, 2021, long ol pipel i ken yusim dispela veksin long taim nogut. Gavman bilong Papua Niugini tu i bin givim tok orait long dispela veksin long Me 20, 2021.

Saina i bin givim moa long 350 milien Sinopharm veksin i go long ol arapela kantri long wol pinis. Ol Solomon Ailan na Vanuatu i statim pinis rolaut bilong Sinopharm Veksin.

Senta bilong Disis Kontrol na Privensen long Saina i lukluk na sekim dispela veksin long Disemba 15, 2020 inap Epril 30, 2021 na ol i luksave olsem nogat bikpela bagarap i kamap long ol lain kisim dispela veksin, olsem na ol i tok veksin bilong Saina em i seif.

Bipo long ol dispela Sinopharm COVID-19 Veksin i kam, Helt Minista Jelta Wong i bin tok dispela em i bikpela na strongpela pasin we Saina i mekim long soim sapot bilong en long daunim COVID-19 pandemik long kantri. Em i tok ol manmeri na pikinini long Papua Niugini i gat rait long makim wanem veksin ol i laik kisim sapos ol i laik kisim veksin long banisim ol yet.

Rebecca Negere i raitim