WANPELA grup long Madang ol i kolim Frens ov Madang Jeneral Haus Sik, bai mekim wanpela fanresing wokabaut i go long Maunten Kanagioi long Karkar Ailan, neks wik.

Ol 20 memba bilong grup bai mekim dispela wokabaut.

Dispela wokabaut em wanpela spesel fan-raising ol i laik wokim long kamapim mani long helpim kensa yunit bilong Madang Jeneral Haus Sik na TB yunit bilong Gaubin Rural Haus Sik long Karkar Ailan.

Mausmeri bilong grup na Vais Presiden bilong Frens ov Madang Haus Sik, Pamela Eugenio i tok dispela wokabaut bai kamap long namba wan wik bilong mun Julai na ol wok redi i kamap pinis.

Em i tok las yia grup i bin mekim fanresing wokabaut i go antap long longpela maunten bilong PNG, Maun Wilhelm long Simbu provins. Dispela fanresing wokabaut i bin kamapim moa long K50,000 na ol i bin skelim dispela mani namel long Kensa yunit na Kadiak yunit bilong Madang Jeneral Haus Sik.

Ms Eugenio i tok grup i makim Maunten Kanagioi long Karkar Ailan bikos em i longpela maunten long noten Niugini na i stap long ailan.

Em i tok ol i makim Kanagioi tu bikos ol i luksave olsem Gaubin rural haus sik long Karkar ailan we Luteran Sios i ranim, i nidim helpim long TB yunit bilong en. Olsem na bai ol i givim hap mani i go long baim ol ikwipmen bilong dispela TB yunit bilong Gaubin rural haus sik.

Em i tok grup bai i go slip long ples Gamog, na wokabaut i go antap long maunten.

Ol memba bai sainim agrimen pepa wantaim husat ol sponsa i laik givim 50 toea o K1 long wan wan mita ol I wokabaut long en.

Ms  Eugenio tok tenkyu long ol sponsa olsem PNG Turism Promosen Atoriti husat i namba wan long helpim wantaim K5000, na tu ol arapela kampani long Madang husat i helpim olsem Sigma Konstraksen na Rookes Marine.

Em i tok husat ol wan wan lain i laik helpim grup wantaim wara botol, na bisket o wanem liklik samting em i op tasol bikos wokabaut bai i stat long neks wik.

James G. Kila i raitim