WANPELA tim bilong Konsaltetiv na Implementesen na Monitoring Kaunsil (CIMC) na World Vision i bin stap long Madang las wik Tunde long opim wanpela bikpela edukesen program ol i kolim Skul Komyuniti Akauntabiliti Agrimen (SCAA).

SCAA em nupela kain program bilong helpim divelopmen long eduksen sistem long elementeri level na ol i makim Madang, Morobe na Sentral provins long traim ranim dispela program long hap.

Bai dispela SCAA program i kamap long 10-pela elementeri skul long Madang, Morobe na Sentral provins em olgeta stekholda i mas wokbung wantaim long lukim gutpela kaikai bilong program i kamap long bihain taim.

Madang provins em namba wan provins long PNG long lukim dispela program long Barum praimeri skul long Trans Gogol LLG. Dispela program bai karamapim tu Mair elementeri.

Ol sumatin na tisa bilong Barum na Mair i bin bung wantaim long amamasim dispel de.

World Vision PNG kantri dairekta, Heather MacLeod, i givim strongpela salens long ol papamama na ol tisa na komyuniti long wok bung long lukim olsem edukesen bilong pikinini long elementeri level i mas kamap orait na divelopmen bilong pikininin long save long rit na rait na kaunim namba i gutpela.

MacLeod i tok SCAA em i gutpela sistem bilong strongim pasin bilong komyunikesen, gutpela pasin bilong ranim elementeri skul (governance) gutpela pasin bilong serim infomesen, bungim ol risos na serim wantaim, serim tingting na wokbung na gutpela sapot na komitmen namel long ol stekholda.

SCAA i kamapim stendet o wok-mak namel long ol sevis provaida na sevis resipien na i givim wanem wok long ol dispela lain i mas mekim long helpim ol elementeri skul sumatin. Dispela ol stekholdas em ol klas tisa, lain i go pas olsem het tisa, skul bod ov menesmen, ol arapela tisa na papamama na lain i lukautim ol skul pikinini na wod kaunsila long ples.

Em i tokaut olsem tingting bilong SCAA i kamaut long Sevis Chater we CMIC i divelopim na i traim pinis long ol sampela sevis sekta long helt, edukesen, viles kot na lens mediesin long Oro na Morobe provins aninit long wokbung wantaim gavman bilong Australia.

Em samting SCAA bai i kamapim em long pasin blong promotim wokbung namel long ol stekholda long kamapim gutpela wok long helpim ol skul sumatin long elementeri skul.

MacLeod i tok ol papamama long PNG i mas amamas olsem Gavman na pipel bilong Australia i putim mani long kamapim dispela SCAA program long PNG.

Madang Distrik Edukesen Edvaisa, John Kim i givim bikpela salens tu long ol yangpela lain husat i tingting long marit na kamapim pikinini olsem ol i mas plenim gut pastaim bipo long ol i kamapim pikinini.

Kim i tok tude long Madang provins planti papamama em ol yangpela marit i no save tingting strong na plenim bihain taim bilong ol pikinini bilong ol long skul, baim skul fi na ol nids bilong pikinini.

Em i tok ol yangpela man na meri husat i tingting tasol long amamasim bodi na i no gat plen long kamapim pikinini na lukautim, em ol i no ol trupela lain. Ol i no gat plen long laip bilong ol na ol i westim taim nating long ples graun papa God i givim ol.

James G. Kila i raitim